ހިންދޫ ފާދިރީއަކު ރާއްޖެ އައިސް ރޫހާނީ ފަރުވާގެ ނަމުގައި ހިންދޫ ދީނާ ގުޅޭ ކްލާސްތައް ނަގައި، މީސްމީޑިއާގައި އިޝްތިހާރުކުރާ މައްސަލަ ކަމާބެހޭ ފަރާތްތަކަށް ހުށަހަޅާފައިވާކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މާސްޓަރ ދުރްގާ ރައޯ ގެ ނަމުގައި ހިންގާ ފޭސްބުކް ޕޭޖަކުން މި ހިންދޫ ފާދިރީ ރާއްޖޭގައި ކޯސް ހިންގާ ކަން އިއުލާންކޮށްފައިވެއެވެ. އޭނާ އިއުލާންކޮށްފައިވާ ގޮތުގައި، ރޫހާނީ ފަރުވާއާއި ފާލުބެލުން ފަދަ އިސްލާމްދީނުގައި ޙަރާމް ކަންކަން ކުރިއަށް ގެންދާނެއެވެ. މީގެ ދެ ދުވަސް ކުރިން ހުޅުމާލޭގައި ފެށި މި ހަރަކާތުގެ ކޮންމެ ސެޝަނަކަށް 300 ރުފިޔާ ނަގާކަމަށާއި، ވަރަށް ގިނަ މީހުން އޭނާގެ ޚިދުމަތް ހޯދަމުންދާކަމަށް މީސްމީޑިއާ ޕޯސްޓަރުގައި ބަޔާންކޮށްފައިވެއެވެ.
މި ފާދިރީގެ ޚިދުމަތް ދޭ ތަނުގައި ހިންދޫ ދީނުގެ މީހުން އަޅުކަންކުރާ ޒާތުގެ ބޮޑު ބުދެއް ބަހައްޓާފައިވާއިރު، އެތަނުގެ ވަށައިގެން އަތުރާފައި ހުރީވެސް ހަމަ އެފަދަ ތަކެއްޗެވެ.
ބައެއް މީޑިއާތަކަށް މި މައްސަލައާ ގުޅޭގޮތުން މައުލޫމާތު ދެއްވަމުން އިސްލާމިކް މިނިސްޓަރ ޑރ. ޝަހީމް ވިދާޅުވެފައިވަނީ މި މައްސަލަ މިހާރު ވާނީ ކަމާބެހޭ ފަރާތްތަކާ ހިއްސާކުރެވިފައި ކަމަށެވެ. އަދި އިސްލާމީ އަޤީދާއާ ޚިލާފު ކަންކަމަށް ރާއްޖޭގައި ޖާގައެއް ނޯންނާނެ ކަމަށާއި، އެއީ ޤާނޫނާ ޚިލާފު ކަމެއްކަމަށް ވަޒީރު ވިދާޅުވިއެވެ. މި މައްސަލައިގައި ފުލުހުންގެ ބަހެއް އަދި ލިބިފައެއް ނުވެއެވެ.
މިދިޔަ އޮގަސްޓު މަހުގެ ތެރޭގައިވެސް މިފަދަ ހާދިސާއެއް ހިނގާފައިވެއެވެ. އެއީ ފާދިރީއަކު އައިސް ރޫހާނީ ފަރުވާގެ ކްލާސްތައް ނަގައިދޭ ކަމަށް ބުނެ ކެމްޕޭނެއް ހިންގި މައްސަލައެކެވެ. އެ މައްސަލައިގައި އާންމުންގެ ނުރުހުން ފާޅުވުމާ ގުޅިގެން، އޭނާ ފުލުހުންގެ ބެލުމުގެ ދަށަށް ގެންދިޔުމަށްފަހު ފަހުން ވަނީ ޑިޕޯޓުކޮށްފައެވެ.
