ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކުން ދައްކާގޮތުގައި މިއަހަރުގެ މިހާތަނަށް 117,532 ފަތުރުވެރިން ދިވެހިރާއްޖެއަށް ޒިޔާރަތްކޮށްފައިވެއެވެ. މިއީ ފާއިތުވި އަހަރުގެ މި މުއްދަތާ އަޅާބަލާއިރު 9.7 އިންސައްތައިގެ ކުރިއެރުމެކެވެ. އެގޮތުން 2023 ވަނަ އަހަރުގެ މި މުއްދަތުގައި 97,882 ފަތުރުވެރިންނާއި، 2024 ވަނަ އަހަރު 107,119 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިޔާއިންނެވެ. އެ ގައުމުން 15,077 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، އެއީ މުޅި ޖުމްލައިގެ 12.8 އިންސައްތައެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ އިޓަލީވިލާތުންނެވެ. އެ ގައުމުން 12,560 ފަތުރުވެރިން ޒިޔާރަތްކޮށްފައިވާއިރު، ތިންވަނައިގައިވާ ޗައިނާއިން 11,560 ފަތުރުވެރިން ޒިޔާރަތްކޮށްފައިވެއެވެ.

މިވަގުތު ރާއްޖޭގައި ފަތުރުވެރިކަމުގެ ޖުމްލަ 1,155 ތަނެއް ހިންގަމުން ގެންދެއެވެ. މީގެ ތެރޭގައި 173 ރިސޯޓާއި، 816 ގެސްޓްހައުސްގެ އިތުރުން 151 ސަފާރީ އަދި 15 ހޮޓެލް ހިމެނެއެވެ. މި ތަންތަނުގައި ޖުމްލަ 61,790 އެނދު ފަތުރުވެރިކަމަށް އޮޕަރޭޓްކުރެވެއެވެ.

ސަރުކާރުން މިއަހަރަށް ހުށަހަޅާފައިވާ ދައުލަތުގެ ބަޖެޓުގައި 2025 ވަނަ އަހަރު ތެރޭގައި 2.2 މިލިއަން ފަތުރުވެރިން ރާއްޖެއަށް ޒިޔާރަތްކުރާނެ ކަމަށް ލަފާކޮށްފައިވެއެވެ.