މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހުސާންގެ އިތުބާރު ނެތްކަމުގެ މައްސަލަ އެމްޑީޕީން މިއަދު ރައްޔިތުންގެ މަޖިލީހަށް ހުށަހަޅައިފިއެވެ. މި މައްސަލަ ހުށަހެޅުމުގެ ކުރިން އެމްޑީޕީގެ 12 މެންބަރުން ވަނީ ޖެނުއަރީ 16 ވަނަ ދުވަހު އެ މައްސަލައިގައި ސޮއިކޮށްފައެވެ.

މި މައްސަލަ ހުށަހެޅި ސަބަބުތަކުގެ ތެރޭގައި އަލީ އިހުސާންގެ ބެލެނިވެރިކަމުގެ ދަށުގައި ހުރި މުހިންމު މުއައްސަސާތަކައި ގުޅުންހުރި މައްސަލަތައް ހިމެނެއެވެ. މިގޮތުން އޭނާގެ ބެލުމުގެ ދަށުގައި ހުރި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން އަކީ ރައްޔިތުންގެ އަމިއްލަ މައުލޫމާތު ބަލަހައްޓާ ތަނެވެ. އަދި މޯލްޑިވްސް އިމިގްރޭޝަނުން ބަލަހައްޓަނީ ރައްޔިތުންގެ ދަތުރުފަތުރުގެ ރެކޯޑުތަކެވެ. މީގެ އިތުރުން ކޮމިއުނިކޭޝަން އޮތޯރިޓީ އޮފް މޯލްޑިވްސްއިން ބަލަހައްޓަނީ ފޯނާއި އިންޓަނެޓްގެ ހިދުމަތްދޭ ކުންފުނިތަކުގެ ރެގިއުލޭޝަންސްތަކެވެ.

އަލީ އިހުސާންއަކީ ދިވެހި ފުލުހުންގެ ހިދުމަތުގެ އެންމެ އިސް ބެލެނިވެރިޔާ ކަމަށްވެފައި، އޭނާ ވަނީ ގާނޫނުއަސާސީއާއި ގާނޫނުތަކާ ހިލާފު ޖިނާއީ އަމަލުތަކެއް ހިންގާފައި ކަމަށް މައްސަލައިގައި ވަނީ ފާހަގަކޮށްފައެވެ. އަދި އޭނާ މިހާރު ހުރި މަގާމުގައި ދެމިހުރެއްޖެނަމަ، އޭނާގެ މައްޗަށް ހިންގޭ ޖިނާއީ ތަހުގީގަށް ހުރަސްއެޅުމުގެ ފުރުސަތު ބޮޑުކަމަށް ވެސް ވަނީ ފާހަގަކޮށްފައެވެ. އެހެންކަމުން އަލީ އިހުސާން އެ މަގާމުގައި އިތުރަށް ހުރުމަކީ ދިވެހި ރައްޔިތުންގެ ހައްގުތަކަށާއި ގައުމުގެ ސަލާމަތަށް ނުރައްކާވެދާނެ ކަމެއް ކަމަށް އެމްޑީޕީން ބުނެފައި ވެއެވެ.