ދިވެހި މަސްވެރި އުފެއްދުންތައް ޔޫރަޕިއަން ޔޫނިއަން (އީޔޫ) ގެ ބާޒާރަށް ނެރުމުގައި ހުރި ދަތިތައް ހައްލުކުރުމުގައި އެ ޤައުމުގެ އެހީތެރިކަން ފޯރުކޮށްދޭނެކަމަށް އެސްޓޯނިއާގެ ޚާރިޖީ ވުޒާރާގެ ސެކެޓްރީ ޖެނެރަލް، ޖޮނަތަން ސެވިއޮވް ވިދާޅުވެއްޖެއެވެ.
މި އެހީތެރިކަން ލިބޭނެކަމުގެ ޔަގީންކަން ދެއްވާފައިވަނީ ރައީސް ޑރ. މުހައްމަދު މުޢިއްޒު އެސްޓޯނިއާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން އިއްޔެ ބޭއްވުނު ބައްދަލުވުމެއްގައެވެ. މި ބައްދަލުވުމުގައި ރައީސް މުޢިއްޒު ވަނީ ދިވެހި މަސްވެރި އުފެއްދުންތަކަކީ ދެމެހެއްޓެނިވި ގޮތެއްގައި އުފެއްދޭ ތަކެތި ކަމުގައިވީ ނަމަވެސް، އީޔޫ ބާޒާރަށް މި އުފެއްދުންތައް ނެރުމުގައި ދިމާވާ ގޮންޖެހުންތައް ފާހަގަކުރައްވާފައެވެ.
ދެ ޤައުމުގެ އިސްވެރިން މި ބައްދަލުވުމުގައި ވަނީ ދެ ޤައުމުގެ ޚާރިޖީ ގުޅުން އިތުރަށް ބަދަހިކުރުމާއި، އެކުގައި މަސައްކަތްކުރެވިދާނެ އެހެނިހެން ދާއިރާތަކާ ގުޅޭގޮތުންވެސް މަޝްވަރާކުރައްވާފައެވެ. ރައީސް މުޢިއްޒުގެ މި ދަތުރުފުޅުގައި މިހާތަނަށް އެސްޓޯނިއާގެ ރައީސްއާއި، ޤާނޫނު ހަދާ މަޖިލީހުގެ ރައީސްއާއި އަދި ބައެއް ވަޒީރުންނާވެސް ބައްދަލުކުރައްވާފައިވެއެވެ.
މިދިޔަ ހޯމަ ދުވަހު ފެށުނު މި ދަތުރުފުޅަކީ ދިވެހިރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. މި ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާވެ، ވިޔަފާރީގެ ގުޅުންތައް ފުޅާވެގެންދާނެކަމަށް ބެލެވެއެވެ.
