މިދިޔަ އަހަރު މާލެ ސިޓީ ޕޮލިހުން ކުރި މަސައްކަތްތަކުގެ ތެރެއިން 19.2 މިލިއަން ރުފިޔާއަށް ވުރެ ގިނަ އަގުހުރި ތަކެތި ރިކަވަރކުރެވުނު ކަމަށް ފުލުހުންގެ އިދާރާއިން މިއަދު ހާމަކޮށްފިއެވެ. މާލެ ފްރަންޓްލައިން ޕޮލިސިންގ، ތިލަމާލެ ޕޮލިސް އަދި ޓްރެފިކް ޕޮލިސް އެންޑް ރޯޑް މެނޭޖްމަންޓްގެ މަސައްކަތްތަކުގެ ތަފާސްހިސާބުތައް ދައްކާގޮތުން، ޖުމްލަ 1،653 އައިޓަމް ރިކަވަރކުރެވިފައިވެއެވެ.

ރިކަވަރކުރެވުނު ތަކެތީގެ ތެރޭގައި ގާތްގަނޑަކަށް 2 މިލިއަން ރުފިޔާގެ 206 މޯބައިލް ފޯނާއި، 11.5 މިލިއަން ރުފިޔާގެ 253 މޮޓޯސައިކަލް ހިމެނެއެވެ. މީގެއިތުރުން، ގާތްގަނޑަކަށް 1 މިލިއަން ރުފިޔާގެ 107 އިލެކްޓްރޯނިކް އައިޓަމާއި، 551،000 ރުފިޔާގެ 333 އެހެނިހެން އައިޓަމް ރިކަވަރކުރެވުނެވެ. އަދި 374 މައްސަލައަކާ ގުޅިގެން 3.6 މިލިއަން ރުފިޔާގެ ނަގުދު ފައިސާއާއި 616،000 ރުފިޔާގެ 380 އެހެނިހެން އައިޓަމްވެސް ރިކަވަރކުރެވުނެވެ.

ފާއިތުވި އަހަރު މާލެ ސިޓީގައި ޖުމްލަ 5،242 ވޮލިއުމް ކްރައިމް ހުށަހެޅުނެވެ. މީގެ ތެރޭގައި 2،290 ވައްކަމުގެ މައްސަލައާއި، 2،025 އެކްސިޑެންޓް، 414 ފޭރުމުގެ މައްސަލަ، 236 މަސްތުވާތަކެތީގެ މައްސަލަ އަދި 358 މާރާމާރީގެ މައްސަލަ ހިމެނެއެވެ.

ފުލުހުންގެ ތަހުގީގުތަކުގެ ތަފާސްހިސާބުތަކަށް ބަލާއިރު، ޖުމްލަ 9،154 މައްސަލަ ތަހުގީގުކުރެވުނެވެ. މީގެ ތެރެއިން 7،157 މައްސަލައެއް ކޭސްކޮށްގެން ތަހުގީގުކުރެވުނުއިރު، 6،645 މައްސަލަ ފައިލްކުރެވި، 64 މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވުނެވެ. މި އިންސިޑެންޓްތަކާ ގުޅިގެން 1،000 މީހުން ފުލުހުންގެ ބެލުމުގެ ދަށަށް ގެނެވުނުއިރު، 805 މީހުން ހައްޔަރުކުރެވުނެވެ.

ނެއިބަރހުޑް ޕޮލިސިންގގެ މަސައްކަތްތަކުގެ ދަށުން 681 ގޭގެއަށް ޒިޔާރަތްކުރެވި، 1،101 ވިޔަފާރިއަށް ޒިޔާރަތްކުރެވުނެވެ. މީގެއިތުރުން 3،221 ޕަބްލިކް އިންޓަރެކްޝަނާއި 97 ކުށް މަދުކުރުމުގެ ހަރަކާތް ހިންގުނެވެ. އަދި 907 އާންމު ކަންބޮޑުވުމުގެ މައްސަލައާއި، ވެމްކޯއާ ގުޅިގެން 241 ކުނީގެ މައްސަލަ ހައްލުކުރެވުނެވެ. ސިޓީ ކައުންސިލާ ގުޅިގެން 153 މުނިސިޕަލް މައްސަލައާއި 142 ޓްރެފިކް މައްސަލަވެސް ހައްލުކުރެވުނެވެ.

އާންމުން ހޭލުންތެރިކުރުމަށް ގިނަ މަސައްކަތްތަކެއް ކުރެވުނެވެ. މީގެ ތެރޭގައި ބެލެނިވެރިންނަށް 10 ޕްރޮގްރާމާއި، ދަރިވަރުންނާއި ޓްރެފިކް މޮނިޓަރުންނަށް 53 ޕްރޮގްރާމް، އަދި ކުންފުނިތަކާއި ސަރުކާރު އޮފީސްތަކަށް 34 ޕްރޮގްރާމް ހިންގުނެވެ. ފުލުހުންނަށް 17 ޕްރޮގްރާމާއި ޓެކްސީ ޑްރައިވަރުންނަށް 8 ޕްރޮގްރާމް ހިންގުނެވެ. އަދި 35 ކުޑަކުދިންގެ ހަވީރުގައި ބައިވެރިވެ، ޓީވީ އަދި ރޭޑިއޯ މެދުވެރިކޮށް 17 ޕްރޮގްރާމް ހިންގުނެވެ. މި ހުރިހާ ޕްރޮގްރާމްތަކުން ޖުމްލަ 36،104 މީހުންނާ މަޢުލޫމާތު ހިއްސާކުރެވުނެވެ.