އެމްއެންޑީއެފްއިން ރޭގެ ވަގުތެއްގައި މާލޭގެ 63 ގޭބިސީއެއްގައި 533 ވެލިބަސްތާ ޖަހައިދީފިއެވެ. މިއީ ކުރިއަށް އޮތް ދުވަސްތަކުގައި މާލެއަށް ބޯކޮށް ވާރޭވެހި ވިއްސާރަވާނެކަމަށް ލަފާކުރެވޭތީ އެޅި ސަލާމަތީ ފިޔަވަޅެކެވެ.
މާލޭ އޭރިއާ ކޮމާންޑުން މައުލޫމާތު ދެމުން ބުނެފައިވަނީ ރައްޔިތުންނަށް އެހީތެރިކަން ފޯރުކޮށްދިނުމަށް ހިންގި މި އޮޕަރޭޝަން ކުރިއަށް ގެންގޮސްފައިވަނީ ރޭ މެންދަމު 2:26 އާ ހަމައަށް ކަމަށެވެ.
މޫސުމާބެހޭ ދާއިރާއިން ދީފައިވާ މައުލޫމާތުގައިވާ ގޮތުން ކުރިއަށް އޮތް ދުވަސްތަކުގައި ރާއްޖޭގެ ގިނަ ސަރަހައްދުތަކަށް ވިއްސާރަކޮށް ގުގުރާނެއެވެ. އަދި ބައެއް ރަށްރަށަށް ބޯކޮށް ވާރޭވެހުން އެކަށީގެންވާ ކަމަށްވެސް މެޓް އިން ވަނީ އިންޒާރު ދީފައެވެ.
މީގެއިތުރުން، ދެކުނުގެ އަތޮޅުތަކަށް ވައިޖެހޭނީ ހުޅަނގާއި ހުޅަނގު އުތުރުން ކަމަށާއި، އެހެން ސަރަހައްދުތަކަށް ވައިޖެހޭނީ އިރުއުތުރާއި އިރުން ކަމަށް މެޓް އިން ވަނީ ފާހަގަކޮށްފައެވެ. ވައިގެ ބާރުމިން ހުންނާނީ ގަޑިއަކު 8 މޭލާއި 18 މޭލާ ދެމެދުގައި ކަމަށާއި، ވިއްސާރައިގެ ތެރޭގައި ވައިގެ ބާރުމިން ގަޑިއަކު 35 މޭލަށް އަރާފާނެކަމަށްވެސް އެފަރާތުން ވަނީ އަންގާފައެވެ.
