ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް ކުރައްވަމުންދާ ތާރީޚީ ދަތުރުފުޅުގައި، އެ ޤައުމުގެ ރައީސް އަލަރ ކަރިސްއަށް ޚާއްސަ ޝުކުރެއް އަދާކުރައްވައިފިއެވެ. ރާއްޖޭގެ ރައީސަކު އެސްޓޯނިއާއަށް ކުރައްވާ މި ފުރަތަމަ ދަތުރުފުޅާ ގުޅޭގޮތުން އެކްސްގައި ޕޯސްޓެއް ކުރައްވަމުން، ރައީސް މުޢިއްޒު ވަނީ އެ ޤައުމުގެ ރައީސާއި ސަރުކާރުން ދެއްވި ދަޢުވަތަށާއި، ލިބިވަޑައިގެންނެވި ފުރިހަމަ މެހެމާންދާރީއާއި ހޫނު މަރުޙަބާއަށް ޝުކުރު އަދާކުރައްވާފައެވެ.
އިއްޔެ އެސްޓޯނިއާގެ ރައީސާއެކު ބޭއްވެވި އުފާވެރި އަދި ފައިދާހުރި ބައްދަލުވުމުގައި، ދެ ޤައުމުގެ ގުޅުން ބަދަހިކުރުމުގެ މައްޗަށް މަޝްވަރާކުރެވުނެވެ. މީގެ އިތުރުން، ޑިޖިޓަލް ދާއިރާ، ސައިބަރ ސެކިއުރިޓީ، މޫސުމަށް އަންނަ ބަދަލުތައް އަދި ތަޢުލީމީ ދާއިރާގެ ކަންކަމުގައި ދެ ޤައުމުގެ އިސްކަންދޭ ކަންތައްތަކުގެ މައްޗަށް ބިނާކޮށް ކުރިއަށް އޮތް އަހަރުތަކުގައި އެއް ވިސްނުމެއްގައި މަސައްކަތްކުރުމަށް ވަނީ އެއްބަސްވެވިފައެވެ.
ރައީސް މުޢިއްޒު ފާހަގަކުރެއްވި ގޮތުގައި، ދިވެހިރާއްޖެ އަދި އެސްޓޯނިއާ ފަދަ ކުދި ޤައުމުތަކުގެ މެދުގައި އެއްބައިވަންތަކަމާއި އެކުވެރިކަން އޮތުމަކީ އެ ޤައުމުތަކުގެ ސަލާމަތާއި މިނިވަންކަމަށް މުހިންމު ކަމެއްގެ އިތުރުން، ދުނިޔޭގެ ސުލްޙައާއި ދެމެހެއްޓެނިވި ތަރައްޤީއަށްވެސް މުހިންމު ކަމެކެވެ.
