ޑިމޮކްރެޓިކް ޕާޓީގެ ވަގުތީ އައު ރައީސެއްގެ ގޮތުގައި މިރޭ ބޭއްވުނު ނޭޝަނަލް އެސެމްބްލީގައި މަޑަވެލި ދާއިރާގެ ކުރީގެ މެންބަރު ހުސައިން ފިރުޝާން އިންތިހާބު ކޮށްފިއެވެ. މިއިންތިހާބުގައި ވާދަކުރެއްވި ދެ ކެންޑިޑޭޓުންގެ ތެރެއިން ފިރުޝާނަށް 29 ވޯޓު ލިބުނިއިރު، އަނެއް ކެންޑިޑޭޓް އަލައިކާއަށް ލިބިފައިވަނީ 14 ވޯޓެވެ. ޕާޓީގެ ވޯޓުލުމުގެ ހައްގު ލިބިފައިވާ 130 މެންބަރުންގެ ތެރެއިން މި އިންތިހާބުގައި ބައިވެރިވީ 44 މެންބަރުންނެވެ.
މި މަގާމު ހުސްވެގެން ދިޔައީ، މިހާތަނަށް ޕާޓީގެ ރައީސްކަން ކުރައްވަމުން ގެންދެވި ހަސަން ލަތީފް ޑިމޮކްރެޓިކް ޕާޓީ ދޫކޮށް އެމްޑީޕީއާ ގުޅިވަޑައިގަތުމާ ގުޅިގެންނެވެ. ޕާޓީގެ އަސާސީ ގަވާއިދުގައިވާ ގޮތުން، ރައީސްގެ މަގާމު ހުސްވެއްޖެ ހާލަތެއްގައި، އެ މަގާމު ވަގުތީ ގޮތުން ފުރުއްވަން ޖެހެނީ ނައިބު ރައީސުންގެ ތެރެއިން ބޭފުޅެކެވެ.
މިރޭ ބޭއްވުނު ޖެނެރަލް އެސެމްބްލީގައި ވަނީ އަންނަ 40 ދުވަހުގެ ތެރޭގައި އިންތިހާބެއް ބާއްވައި، ޕާޓީގެ ދާއިމީ އައު ރައީސަކު ހޮވުމަށް ފާސްކުރެވިފައެވެ.
