ވައިކަރަދޫ ދާއިރާގެ ރައްޔިތުންގެ މަޖިލީހުގެ މެންބަރު، އަދި އެމްޑީޕީގެ މެންބަރު ފިއްޓޭ، އޭނާގެ ރުހުމަކާ ނުލައި ޕީއެންސީގެ މެންބަރެއްގެ ގޮތުގައި ރަޖިސްޓްރީ ކުރެވިފައިވާކަން އެނގި، މިކަމާމެދު ރައީސް ސާލިހު ކަންބޮޑުވުން ފާޅުކުރައްވައިފިއެވެ.
ރައީސް ސާލިހު މިއަދު ކުރެއްވި އެކްސް ޕޯސްޓެއްގައި ވިދާޅުވީ، މިއީ އާންމު ރައްޔިތުންގެ ޒާތީ މަޢުލޫމާތު ނަހަމަ ގޮތުގައި ބޭނުންކޮށްގެން ޕީއެންސީއަށް މެންބަރުން ވެއްދުމުގެ އެންމެ ފަހުގެ ސިލްސިލާ ކަމަށާއި، މިކަމާ ގުޅިގެން ގިނަ ރައްޔިތުން އިލެކްޝަންސް ކޮމިޝަނުގެ މަސައްކަތްތަކާމެދު ސުވާލު އުފައްދާ ކަމުގައެވެ.
އާންމު އެތައް ރައްޔިތެއްގެ ޒާތީ މަޢުލޫމާތު ނަހަމަ ގޮތުގައި ބޭނުންކޮށް އޮޅުވާލައިގެން ޕީއެންސީއަށް އެބަ ވައްދައެވެ. އެންމެ ފަހުން މިއެނގުނީ އެމްޑީޕީ އަށް ނިސްބަތްވާ ވައިކަރަދޫ ދާއިރާގެ ރައްޔިތުންގެ މަޖިލީހުގެ މެންބަރުވެސް އޮޅުވާލައިގެން ޕީއެންސީއަށް ވެެއްދި ވާހަކައެވެ.
ރައީސް ސާލިހު ކުރެއްވި އެކްސް ޕޯސްޓުގައި ވިދާޅުވެފައި ވެއެވެ.
ޤާނޫނުގައިވާ ގޮތުން، އިލެކްޝަންސް ކޮމިޝަނަކީ ސިޔާސީ ޕާޓީތަކުގެ ރަޖިސްޓްރީއާއި މެންބަރުޝިޕް ބެލެހެއްޓުމުގެ ޒިންމާ އުފުލަންޖެހޭ މުއައްސަސާއެވެ. ނަމަވެސް މިފަދަ ހާދިސާތައް ތަކުރާރުވަމުންދާތީ، ކޮމިޝަނުގެ މަސައްކަތްތައް އިތުރަށް ހަރުދަނާކުރަން ޖެހޭކަމަށް ގިނަ ފަރާތްތަކުން ފާހަގަކުރެއެވެ.
ސުވާލަކީ އިލެކްޝަންސް ކޮމިޝަނުގެ ޤާނޫނީ ޒިންމާ ފުރިހަމައަަށް އެބަ އަދާ ކުރޭ ބާވައެވެ. އިލެކްޝަންސް ކޮމިޝަނަކީ ރައްޔިތުން ފުރިހަމައަށް އިތުބާރުކުރާ ތަނަކަށް ވާން އެބަޖެހެއެވެ.
ރައީސް ސާލިހުގެ އެކްސް ޕޯސްޓުގައި އިތުރަށް ވިދާޅުވެފައި ވެއެވެ.
މި މައްސަލައާ ގުޅޭގޮތުން އިލެކްޝަންސް ކޮމިޝަނުން އަދި ވަކި އެއްޗެއް ވިދާޅުވެފައެއް ނުވެއެވެ. ނަމަވެސް މި މައްސަލަ ބެލުމަށް ޚާއްޞަ ކޮމިޓީއެއް އެކުލަވާލާފައިވާ ކަމަށް ކޮމިޝަނުގެ އިސް މުވައްޒަފެއް ބައެއް މީޑިއާތަކަށް މަޢުލޫމާތު ދީފައި ވެއެވެ.
