ރާއްޖޭގެ މޫސުމަށް ބޮޑު ބަދަލެއް އަންނާނެ ކަމަށް ބަލާ، އެކަމަށް ތައްޔާރުވުމުގެ ގޮތުން މިއަދު ޕޮލިސް، އެމްއެންޑީއެފް، އަދި އެންޑީއެމްއޭ އިން ގުޅިގެން ނޫސްވެރިންގެ ބައްދަލުވުމެއް ބާއްވައިފިއެވެ. މި ބައްދަލުވުމުގައި މި މަހުގެ 18 ވަނަ ދުވަހުގެ ނިޔަލަށް ރާއްޖޭގެ ހުރިހާ ހިސާބަކަށް ވެސް މޫސުން ގޯސްވެ، ބޯކޮށް ވާރޭވެހި، އުދައަރާނެ ކަމަށް މަޢުލޫމާތު ދެއްވިއެވެ.
ބައްދަލުވުމުގައި މަޢުލޫމާތު ދެއްވަމުން އެންޑީއެމްއޭގެ ޗީފް އެގްޒެކެޓިވް ހިސާން ޙަސަން ވިދާޅުވީ، މިހާރުވެސް މާލޭގެ އެކި ސަރަހައްދުތަކުގައި ވެލި ބަސްތާ ޖެހުމުގެ މަސައްކަތް ކުރިއަށްދާ ކަމަށާއި، މި މަހު ކުރިން ވެހުނު ވާރޭގައި ޖެހި ވެލި ބަސްތާތައްވެސް އަދި ހުންނާނެ ކަމަށެވެ. އަދި ފެންބޮޑުވާ ސަރަހައްދުތަކުގައި ހުރި ވިޔަފާރިތަކާއި ގުދަންތަކުގައި ބަހައްޓާފައި ހުންނަ އަގުބޮޑު މުދަލަށް ގެއްލުން ނުވާނެހެން ރައްކާތެރިކަމުގެ ފިޔަވަޅު އެޅުމަށް އިލްތިމާސްކުރެއްވިއެވެ.
ފެންބޮޑުވާ ގަޑިތަކުގައި ބަރު އުޅަނދުފަހަރު ނުދުއްވުމަށް ހިސާން އިލްތިމާސްކުރެއްވި އިރު، މިކަން ފުލުހުންގެ ތަރުޖަމާނު އޭސީޕީ އަލީ ޝުޖާއުވެސް ތަކުރާރުކުރެއްވިއެވެ. އަދި ވާރޭގަދަވާ ދުވަސްތަކުގައި ސައިކަލުތަކަށް ލިބޭ ގެއްލުން ކުޑަކުރުމަށްޓަކައި، އާންމުކޮށް ޕާކުކުރާ ސަރަހައްދުގައި ސައިކަލަށް ގެއްލުންވާނަމަ އެހެން ތަނެއްގައި ޕާކުކުރުމަށް ހިސާން އެދިވަޑައިގެންނެވިއެވެ. މިހާތަނަށް ފެންބޮޑުވެ ގެއްލުންވާކަން ފާހަގަކުރެވިފައިވާ 57 ތަނެއްގައި ވެލި ބަސްތާ ޖެހުމުގެ މަސައްކަތް ކުރިއަށްދާކަން ހިސާން ފާހަގަކުރެއްވިއެވެ.
ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވީ ބަނޑޭރި ކޮށީގައި ޖޮއިންޓް އޮޕަރޭޝަން ސެންޓަރެއް ގާއިމްކުރެވިފައިވާ ކަމަށެވެ. އަދި މާލޭގެ ތިން ސަރަހައްދެއްގައި، އެއީ ކުޑަކުދިންގެ ބަގީޗާ، ހެންވޭރު ސަލްމާން މިސްކިތް، އަދި ރަސްފަންނުގައި ސިފައިންގެ ޔުނިޓުތައް ގާއިމްކުރެވި، އެ ޔުނިޓުތަކުން ވެލި ބަސްތާ ބޭނުންވާ ފަރާތްތަކަށް ފޯރުކޮށްދެމުންދާ ކަމަށް އޭނާ ފާހަގަކުރެއްވިއެވެ.
