ކުރިއަށް އޮތް ދުވަސްތަކުގައި މޫސުން ގޯސްވާނެ ކަމަށް މޫސުމާ ބެހޭ އޮފީހުން ލަފާކޮށްފައިވާތީ އަޅާ ފިޔަވަޅެއްގެ ގޮތުން، މިއަދު އެމްއެންޑީއެފުން ވަނީ މާލޭގެ ތިން ތަނަކުން ވެލި ބަސްތާ ލިބޭނެ އިންތިޒާމު ހަމަޖައްސާފައެވެ.
ވިއްސާރައިގެ ސަބަބުން ލިބިދާނެ ގެއްލުންތަކުން ރައްކާތެރިވުމަށްޓަކައި ފުލުހުންނާއި ސިފައިން އަދި އެންޑީއެމްއޭ ގުޅިގެން މިއަދު ވަނީ ޖޮއިންޓް އޮޕަރޭޝަނެއް ފަށާފައެވެ. އިސްކަންދަރު ކޮށީގައި ބޭއްވުނު ޕްރެސް ކޮންފަރެންސެއްގައި ޗީފް އޮފް ޑިފެންސް ފޯސް އިބްރާހިމް ހިލްމީ ވިދާޅުވި ގޮތުގައި، ވެލި ބަސްތާ ލިބޭނެ ތަންތަނަކީ ކުޑަކުދިންގެ ބަގީޗާއާއި ސަލްމާން މިސްކިތް ހުންނަ ސަރަހައްދު އަދި ރަސްފަންނެވެ.
ޕޮލިސް ކޮމިޝަނަރު އަލީ ޝުޖާއު ހާމަކުރެއްވި ގޮތުގައި މި މަހުގެ ކުރީކޮޅު ކުރި ވިއްސާރައިގައި އެންމެ ބޮޑަށް ގެއްލުންވި 56 އަށްވުރެ ގިނަ ގޭގައި މިހާރުވެސް ވަނީ ވެލި ބަސްތާ ޖަހައިދީފައެވެ. އެންޑީއެމްއޭގެ ސީއީއޯ ހިސާން ހަސަން ވިދާޅުވީ އިތުރު ގެތަކުން ވެސް ވެލި ބަސްތާ ޖެހުމަށް އެދިއްޖެނަމަ އެ އިންތިޒާމު ހަމަޖައްސައިދޭނެ ކަމަށެވެ. އަދި މިހާރުވެސް ވެލި ބަސްތާ ޖަހަންޖެހޭ އިތުރު ތަންތަން ފާހަގަކުރެވި، އެ މަސައްކަތް މިއަދުގެ އެކި ވަގުތުތަކުގައިވެސް ކުރިއަށްދާނެ ކަމަށް އޭނާ ވިދާޅުވިއެވެ.
އެންޑީއެމްއޭއިން ވަނީ އިމަޖެންސީ ހާލަތްތަކުގައި އެހީތެރިކަން ބޭނުންވާނަމަ އެ އިދާރާގެ ހޮޓްލައިން 115 އަށް ގުޅުމަށް އާންމުންނަށް އިލްތިމާސްކޮށްފައެވެ. މި މަހު ކުރީކޮޅުވެސް ރާއްޖެއަށް ވަރަށް ބޮޑަށް މޫސުން ގޯސްވެ، މާލެ އާއި ރަށްރަށުގައި ވަރަށް ބޮޑަށް ފެންބޮޑުވެ، ބޮޑެތި ގެއްލުންތަކެއް ލިބުނެވެ. އޭގެ ތެރެއިން އެންމެ ބޮޑަށް ގެއްލުން ލިބިފައިވަނީ މާލެއަށެވެ.
