އެލައިޑް އިންޝުއަރެންސްގެ 40 ވަނަ އަހަރީ ދުވަސް ފާހަގަކުރުމުގެ ގޮތުން ހިންމަފުށީގައި "ޑައިވް40″ ގެ ނަމުގައި ހާއްސަ އިވެންޓެއް ކުރިޔަށް ގެންގޮސްފިއެވެ. މި އިވެންޓަކީ ރާއްޖޭގައި އިންޝުއަރެންސްގެ ހިދުމަތް ދެމުން އަންނަ، ސަރުކާރު ހިއްސާވާ ކުންފުނި، އެލައިޑް އިންޝުއަރެންސްގެ ކިކްއޯފް އިވެންޓެވެ.
މި އިވެންޓުގައި، މޯލްޑިވްސް އެކަޑަމީ އޮފް ޑައިވިންގ އާއި އެކު ހޭލުންތެރިކަން އިތުރުކުރުމުގެ ސެޝަނެއް ބޭއްވުނެވެ. އަދި "ޑައިވް އަގެއިންސްޓް ޑެބްރީ" ގެ ނަމުގައި ކަނޑުގެ އަޑިން ކުނި ނެގުމުގެ ހަރަކާތެއްވެސް ކުރިޔަށް ގެންދެވުނެވެ. މީގެ އިތުރުން، ހިންމަފުށީ ކައުންސިލް، ސްކޫލް އަދި ގެސްޓްހައުސްތަކާއި ގުޅިގެން ހިންމަފުށީ މަލަމަތި ސާފުކުރުމުގެ ހަރަކާތެއްވެސް ހިންގުނެވެ. މި ހުރިހާ ހަރަކާތެއްގައިވެސް އެލައިޑްގެ މެނޭޖްމަންޓާއި މުވައްޒަފުން ބައިވެރިވެ، ޕްލާސްޓިކް މަދުކޮށް ކަނޑުތައް ރައްކާތެރިކުރުމަށް މަސައްކަތްކުރިއެވެ.
މި ހަރަކާތުގެ ތެރެއިން ކަނޑުންނާއި އެއްގަމުން ޖުމްލަ 790.06 ކިލޯގެ ކުނި އެއްކުރެވުނެވެ. މިއީ ހިތްހަމަޖެހޭ ކަމެއް ކަމުގައިވީ ނަމަވެސް، މިއީ ކުރިއަށް އޮތްތަނުގައި ކުރަންޖެހޭ މަސައްކަތުގެ ބޮޑުކަން ދައްކުވައިދޭ ކަމެއްގެ ގޮތުގައި އެލައިޑުން ފާހަގަކުރިއެވެ. އެއްކުރެވުނު ޕްލާސްޓިކް ކުނި ބޭނުންކޮށްގެން ދިވެހި ފަންނުވެރިއަކު ތައްޔާރުކުރާ ހާއްސަ އުފެއްދުމެއް، 2025 ވަނަ އަހަރުގެ ފެބްރުއަރީ މަހުގައި ބޭއްވުމަށް ހަމަޖެހިފައިވާ މޯލްޑިވްސް މެރިން އެކްސްޕޯގައި ބެހެއްޓުމަށް ވަނީ ނިންމާފައެވެ.
އެލައިޑް އިންޝުއަރެންސްގެ އަހަރީ ދުވަހަކީ ޖަނަވަރީ 30 ވަނަ ދުވަހެވެ. މި އަހަރަކީ ކުންފުނީގެ 40 ވަނަ އަހަރު ކަމަށްވުމާއެކު، އެހެން އަހަރުތަކާއި ތަފާތުކޮށް، އަހަރު ތެރެއަށް ބަހާލައިގެން ރާއްޖޭގެ އެކި ކަންކޮޅުތަކުގައި ހަރަކާތްތައް ހިންގުމަށް ވަނީ ނިންމާފައެވެ. މިގޮތަށް ނިންމުމުގެ މަޤްޞަދަކީ ކުންފުނީގެ ތަރައްޤީއަށް ރާއްޖޭގެ އެންމެހާ ރައްޔިތުން ދެއްވާ އިތުބާރާއި ޔަޤީންކަމާއެކު، ކުންފުނިން ހޯދާފައިވާ 40 އަހަރުގެ ކުރިއެރުން ވީހާވެސް ގިނަ ރައްޔިތުންނާ ހިއްސާކުރުމެވެ.
