ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ނިންމެވި ނިންމެވުމެއްގައި، ސްޕެޝަލް އިކޮނޮމިކް ޒޯން (އެސްއީޒެޑް) ގައި ހުއްދަކުރެވިފައިވާ އިޤްތިޞާދީ ޙަރަކާތްތަކުގެ ތެރެއަށް ސަސްޓެއިނަބަލް ޓައުންޝިޕް ޑިވެލޮޕްމަންޓް އިތުރުކުރައްވައިފިއެވެ. މިއީ ތިމާވެއްޓާ ރައްޓެހި، އިޖްތިމާޢީ އަދި އިޤްތިޞާދީ ގޮތުން ދެމެހެއްޓެނިވި އުޞޫލުތަކެއްގެ މަތިން ރަށްތައް ތަރައްޤީކުރުމުގެ މަޝްރޫޢުތަކެވެ.
މި އައު ގަރާރުގައިވާ ގޮތުން، ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުއެއް އެސްއީޒެޑެއްގައި ހިންގޭނީ އެ މަޝްރޫޢުއަށް މަދުވެގެން 500 މިލިއަން އެމެރިކާ ޑޮލަރުގެ އިންވެސްޓްމަންޓެއް ކުރާނަމައެވެ. މިއީ 2023 ޖަނަވަރީ 1 ގައި ކަނޑައެޅުނު ނުވަ ބާވަތުގެ މަޝްރޫޢުތަކަށް އިތުރުކުރެވުނު އައު ބާވަތެކެވެ. ކުރީގެ މަޝްރޫޢުތަކަށް ކަނޑައެޅިފައިވާ 100 މިލިއަން ޑޮލަރުގެ އެންމެ ދަށް މިންގަނޑަށް މި ގަރާރުން އެއްވެސް ބަދަލެއް ގެނެސްފައެއް ނުވެއެވެ.
މި ބަދަލު ގެނެވިފައިވަނީ ކ. ގުޅީފަޅު ތަރައްޤީކުރުމަށް ޗައިނާގެ ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީއެމްއީސީ) އާއެކު 2025 ޖަނަވަރީ 6 ގައި ވެވުނު އެއްބަސްވުމާ ގުޅިގެންނެވެ. މި އެއްބަސްވުމުގެ ދަށުން ގުޅީފަޅުގައި ކަރަންޓު ވިއުގަ، ފެނާއި ނަރުދަމާ ނިޒާމު، ޑިއު ވޯޓަރިންގ ސިސްޓަމް، ޒަމާނީ މަގުތައް، ޖީޕޯން ޑަކްޓިންގ ސިސްޓަމް، އަދި ގޭސް ސްޓޯރޭޖް އަދި ޑިސްޓްރިބިއުޝަން ނިޒާމު ޤާއިމުކުރެވޭނެއެވެ.
ސީއެމްއީސީއަކީ ރާއްޖޭގައި 14 އަހަރުގެ ތަޖުރިބާ ލިބިފައިވާ ކުންފުންޏެއް ނަމަވެސް، މި މަޝްރޫޢުއަށް ކުރާނެ އިންވެސްޓްމަންޓުގެ ޢަދަދު އަދި ސަރުކާރުން ހާމަކުރައްވާފައެއް ނުވެއެވެ.
