މިއަހަރުގެ ފުރަތަމަ 11 ދުވަހުގެ ތެރޭގައި ރާއްޖެއަށް 69,553 ފަތުރުވެރިން ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައެވެ. މިއީ މިދިޔަ އަހަރުގެ މިމުއްދަތުގައި ޒިޔާރަތްކުރި 63,156 ފަތުރުވެރިންނާ އަޅާބަލާއިރު 10 އިންސައްތައިގެ އިތުރުވުމެކެވެ.
މިއަހަރުގެ ފުރަތަމަ 11 ދުވަހުގެ ތެރެއިން އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރީ ޖަނަވަރީ 11 ވަނަ ދުވަހުއެވެ. އެދުވަހު 8,090 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އަދި އަހަރުގެ މިހާތަނަށް ކޮންމެ ދުވަހަކުވެސް 5,000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި 11,367 ފަތުރުވެރިންނާއެކު ރަޝިއާ އެންމެ އިސްކޮށް ހިމެނެއެވެ. ދެވަނައަށް އިޓަލީވިލާތުން 8,499 ފަތުރުވެރިންނާއި، ތިންވަނައަށް އިނގިރޭސިވިލާތުން 5,537 ފަތުރުވެރިންނާއި، ހަތަރުވަނައަށް ޖަރުމަނުވިލާތުން 4,369 ފަތުރުވެރިންނާއި، އަދި ފަސްވަނައަށް އިންޑިއާއިން 3,241 ފަތުރުވެރިން ޒިޔާރަތްކޮށްފައިވެއެވެ.
މިދިޔަ އަހަރަކީ ރާއްޖެއަށް 2 މިލިއަނަށްވުރެ ގިނަ ފަތުރުވެރިން ޒިޔާރަތްކޮށް، ރެކޯޑް އަދަދެއް ހާސިލުކުރި އަހަރެވެ. އަދި މިއަހަރު ސަރުކާރުން އަމާޒު ހިފާފައިވަނީ 2.2 މިލިއަން ފަތުރުވެރިން ރާއްޖެއަށް ގެނައުމަށެވެ.
