މާލޭ އިއްޒުއްދީން މަގުގައި، ހާމަ ފިހާރަ ކައިރީގައި ހުންނަ މ. ނެވިގޭޓާ އިމާރާތްކުރަމުން ދަނިކޮށް، އެ ގެއާ ޖެހިގެން ހުރި މ. ލަކީ ހެވެންގެ ބައެއް މިއަދު މެންދުރުފަހު ގަނބައިގެން ގޮސްފައިވާ ކަމަށް މާލޭ ސިޓީ ކައުންސިލުން މަޢުލޫމާތު ދީފިއެވެ.
މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާ ކަމަށް ސިޓީ ކައުންސިލުން ބުނެފައިވެއެވެ. އެ ފަރާތުން އިތުރަށް ބުނެފައިވަނީ މިކަން ހިނގަން މެދުވެރިވެފައިވަނީ ނެވިގޭޓާގެ އިމާރާތްކުރުމުގެ މަސައްކަތް ކުރިއަށް ދިޔައިރު، ޝީޓް ޕައިލް ނުކޮށް ހުރުމުގެ ސަބަބުން ކަމަށް ބެލެވޭ ކަމަށެވެ. މީގެ ސަބަބުން ލަކީ ހެވަންގޭގެ ފާރުތަކުގައި ރެނދުލައި އަދި އަޑިއަށް ދާކަންވެސް ފާހަގަކުރެވިފައިވެއެވެ.
މ.ނެވިގޭޓަރ އިމާރާތްކުރަމުންދަނިކޮށް އެ ގެ ޖެހިގެން ހުރި ގެ މ.ލަކީހެވެންގެ ގަނބައިގަނެ އަޑިއަށްދާތީ އެގެއިން މީހުން ހުސްކުރުމުގެ މަސައްކަތުގައި އެ ދާއިރާގެ ކައުންސިލަރ އިބްރާހިމް އަބޫބަކުރު، pic.twitter.com/zHlhFBvMQ1
— Malé City Council (@MaleCitymv) January 11, 2025
ލަކީ ހެވަންގޭގައި މިވަގުތު ދިރިއުޅެމުން އަންނަނީ ހަތަރު އާއިލާއެކެވެ. މީގެ ތެރޭގައި 18 އަހަރުން ދަށުގެ ތިން ކުދިންނާއި އިތުރު ހަ މީހުން ހިމެނެއެވެ. އަދި އިތުރު ދެ ކޮޓަރީގައި ބޭރު މީހުން ކުއްޔަށް ދިރިއުޅެމުން އަންނަކަމަށް ސިޓީ ކައުންސިލުން ފާހަގަކޮށްފައިވެއެވެ. މި ހުރިހާ ފަރާތްތަކެއް އެހެން ތަނަކަށް ބަދަލުކުރުމުގެ މަސައްކަތް މިހާރު ކުރިއަށްދާ ކަމަށް ސިޓީ ކައުންސިލުން މަޢުލޫމާތު ދީފައިވެއެވެ.
