މިއަހަރުގެ ފުރަތަމަ ފަސް ދުވަހުގެ ތެރޭގައި ރާއްޖެއަށް 32,349 ޓޫރިސްޓުން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ހާމަކުރި ތަފާސް ހިސާބުން ދައްކައިފިއެވެ. މިއީ މިދިޔަ އަހަރުގެ މިމުއްދަތުގައި ރާއްޖެއަށް ޒިޔާރަތްކުރި 27,544 ޓޫރިސްޓުންނާ އަޅާބަލާއިރު 17 އިންސައްތައިގެ އިތުރުވުމެކެވެ.
މި މުއްދަތުގައި ރާއްޖެއަށް އެންމެ ގިނަ ޓޫރިސްޓުން ޒިޔާރަތްކޮށްފައިވަނީ ރަޝިޔާއިންނެވެ. ރަޝިޔާއިން 6,485 ޓޫރިސްޓުން ޒިޔާރަތްކުރިއިރު، އިޓަލީވިލާތުން 5,200 ޓޫރިސްޓުން ޒިޔާރަތްކޮށްފައިވެއެވެ. އިނގިރޭސިވިލާތުން 2,100 ޓޫރިސްޓުންނާއި، ޖަރުމަނުވިލާތުން 2,000 ޓޫރިސްޓުން ރާއްޖެއަށް ޒިޔާރަތްކޮށްފައިވާއިރު، އިންޑިއާއިން 1,127 ޓޫރިސްޓުން ޒިޔާރަތްކޮށްފައިވެއެވެ.
މިދިޔަ އަހަރު ރާއްޖެއަށް ދެ މިލިއަން ޓޫރިސްޓުން ޒިޔާރަތްކުރިއިރު، މިއަހަރުގެ އަމާޒަކީ މަދުވެގެން 2.2 މިލިއަން ޓޫރިސްޓުން ރާއްޖެއަށް ގެނައުމެވެ.
