ވިއްސާރަވެ މާލޭގެ މަގުތަކުގައި ފެން ބޮޑުވާ މައްސަލައަށް ވަގުތީ ހައްލެއް ހޯދުމަށް މޯބައިލް ޓްރެއިލާ ޕަމްޕުތަކެއް ގެނައުމުގެ މަސައްކަތް ކުރަމުންދާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެފައިވެއްޖެއެވެ.
"މިހާރު" ނޫހަށް ދެއްވި އިންޓަވިއުއެއްގައި މިނިސްޓަރު ވިދާޅުވެފައިވަނީ މަގުތަކުގައި ފެން ބޮޑުވާ މައްސަލައަށް ދާއިމީ ހައްލެއް ލިބެންދެން، މި ވަގުތަށް ފެން ހިންދޭނެ އިތުރު ގޮތްތަކެއް ހޯދަން ޖެހިފައިވާ ކަމަށެވެ. އަދި މިވަގުތު އެންމެ މުހިންމު އެއް ކަމަކީ މާލޭގެ މަގުތަކުން ފެން ހިންދުމުގެ ކެޕޭސިޓީ އިތުރުކުރުން ކަމަށް ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވެފައިވަނީ ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިހާރު އެ ޕަމްޕުތައް ގެނައުމުގެ މަސައްކަތް ކުރަމުންދާ ކަމަށެވެ. މޯބައިލް ޓްރެއިލާ ޕަމްޕަކީ އެއްތަނުން އަނެއްތަނަށް ފަސޭހައިން ގެންދެވޭ ގޮތަށް ފަރުމާކޮށްފައި ހުންނަ ފުރޮޅުލީ ޕަމްޕެކެވެ. މިވަގުތު މާލޭގައި ފެން ހިންދަން ބޭނުންކުރަނީ ސިފައިން ގެންގުޅޭ މޯބައިލް ޓްރެއިލާ ޕަމްޕަކާއި އާދައިގެ ކުދިކުދި ޕަމްޕުތަކެވެ.
މިނިސްޓަރު ވިދާޅުވެފައިވާ ގޮތުގައި އިތުރު ފަހެއް ނުވަތަ ހައެއްހާ ޕަމްޕު ލިބިއްޖެނަމަ، ވަރަށް ބޮޑު ރިލީފެއް ލިބިގެންދާނެއެވެ. އެއީ އެފަދަ ކޮންމެ ޕަމްޕަކުން ގަޑިއިރެއްގެ ތެރޭގައި 600 ޓަނުގެ ފެން ބޭރުކުރެވޭތީއެވެ. މިދިޔަ ހުކުރު ދުވަހު މާލެއަށް ކުރި ގަދަ ވިއްސާރާގައި މަގުތަކުގައި ވަރަށް ބޮޑަށް ފެންބޮޑުވެ، ބޮޑެތި ގެއްލުންތަކެއް ލިބުނެވެ. އެދުވަހު ސިފައިންގެ ޕަމްޕުތަކުން 30،000 ޓަނުގެ ފެން ބޭރުކޮށް، މާލޭގެ ފަސް ސަރަހައްދެއްގައި ހަދާފައިވާ ވަގުތީ ޕަމްޕް ސްޓޭޝަންތަކާއެކު ޖުމުލަ 60،000 ޓަނުގެ ފެން ބޭރުކުރެވުނެވެ.
މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް އަންނާނީ ހުރިހާ މަގެއް އަލުން ހެދިގެން ކަމަށް މިނިސްޓަރު ވިދާޅުވެފައިވެއެވެ. މާލެ އާއި ވިލިމާލޭގެ ހުރިހާ މަގެއް އަލުން ހެދުމަށް ޗައިނާ ސަރުކާރުން ވަނީ 100 މިލިއަން ޑޮލަރުގެ ހިލޭ އެހީއެއް ހަމަޖައްސައިދީފައެވެ. އެ މަސައްކަތް ފެށުމަށް މިދިޔަ އަހަރުގެ ނޮވެމްބަރު މަހު ޗައިނާގެ ކޮންސަލްޓަންޓުންގެ ޓީމެއް ރާއްޖެ އައިސް ވަނީ މާލެ އާއި ވިލިމާލޭގެ މަގުތަކުގެ ހާލަތު ބަލައި، ފީސިބިލިޓީ މަރުހަލާ ފަށާފައެވެ. މި އަހަރު މި ޕްރޮޖެކްޓުގެ އަމަލީ މަސައްކަތް ފެށުމަކީ ސަރުކާރުގެ އަމާޒެކެވެ.
