މިދިޔަ ހުކުރު ދުވަހު މާލެއަށް ކުރި ގަދަ ވިއްސާރައިގައި ގެއްލުން ލިބުނު 137 ތަނުގެ ތެރެއިން 92 ގެއެއްގެ އެސެސްމެންޓް މިހާރު ނިންމާފައިވާކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ. އެކި ސަބަބުތަކާ ހުރެ އެސެސްމެންޓް ނުހެދި ހުރި 45 ގޭގެ އެސެސްމެންޓް މާދަމާ ކުރިއަށް ގެންދިއުމަށް ވަނީ ނިންމާފައެވެ.
މި މަސައްކަތުގައި އެންޑީއެމްއޭގެ އިތުރުން މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމެންޓް އަދި ދިވެހި ރެޑްކްރެސެންޓުން ވެސް ވަނީ ބައިވެރިވެފައެވެ. ވިއްސާރައިގެ ސަބަބުން ގެދޮރު ގެއްލުނު 226 މީހަކަށް އެންޑީއެމްއޭ އިން ވަނީ ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދީފައެވެ.
މި ވިއްސާރައިގައި އެންމެ ބޮޑު ގެއްލުން ލިބިފައިވަނީ ފ. ނިލަންދޫ އާއި ކ. ހިންމަފުއްޓަށެވެ. ނިލަންދޫގެ 80 ޕަސެންޓް ސަރަހައްދުގައި ފެން ބޮޑުވެފައިވާއިރު، ހިންމަފުށީގެ 60 ޕަސެންޓް ސަރަހައްދުގައި ފެން ބޮޑުވެފައިވެއެވެ. މީގެ އިތުރުން ކ. ގުރައިދޫގެ 60 ގެއަކަށް އެކި ވަރުގެ ގެއްލުން ލިބިފައިވާކަން އެންޑީއެމްއޭ އިން ފާހަގަކޮށްފައިވެއެވެ. އަދި ށ. ނަރުދޫ އާއި ރ. އިނގުރައިދޫ އަށް އުދައެރުމުގެ ސަބަބުން ވެސް ގެއްލުންތަކެއް ލިބިފައިވާކަން ފާހަގަކުރެވެއެވެ.
