ޑިފެންސް މިނިސްޓަރު މުހައްމަދު ޣައްސާން މައުމޫންގެ އިންޑިއާގެ ރަސްމީ ދަތުރުފުޅު މިހަފްތާގައި ކުރިއަށް ދާނެ ކަމަށް އިއުލާން ކޮށްފިއެވެ. މި ދަތުރުފުޅުގެ ޚަބަރު ހާމަކުރެއްވީ ފޮރިން މިނިސްޓަރު އަބްދުﷲ ޚަލީލް އިއްޔެގެ ނިޔަލަށް އިންޑިއާއަށް ކުރެއްވި ދަތުރުފުޅުގައި އެގައުމުގެ ނޫހަކަށް ދެއްވި އިންޓަވިއުއެއްގައެވެ. އެއީ މި ސަރުކާރުގެ ފޮރިން މިނިސްޓަރު އިންޑިއާއަށް ކުރެއްވި ފުރަތަމަ ރަސްމީ ދަތުރުފުޅެވެ.

މި މަހުގެ 7-8 އަށް ހަމަޖެހިފައިވާ މިނިސްޓަރު ޣައްސާންގެ ދަތުރުފުޅުގައި ދެ ގައުމުގެ އަސްކަރީ ގުޅުން އިތުރަށް ހަރުދަނާކުރުމާއި، ތަމްރީނާއި ތައުލީމުގެ ފުރުސަތުތައް ހޯދުމާއި، އަދި ދެ ގައުމު ގުޅިގެން ކުރެވިދާނެ އެހެނިހެން މަސައްކަތްތަކާ ބެހޭގޮތުން މަޝްވަރާކުރެއްވުމަށް ވަނީ ހަމަޖެހިފައެވެ.

މި ސަރުކާރުން ވެރިކަމާ ހަވާލުވުމުގެ ކުރިން، ރާއްޖޭގައި ތިބި އިންޑިއާ ސިފައިން ފުރުވާލުމަށް ބޭއްވުނު މުޒާހަރާތަކާ ގުޅިގެން، އިންޑިއާއާ އެކު އޮތް ގުޅުން ހީނަރުވެދާނެ ކަމަށް ގިނަ ބަޔަކު ގަބޫލުކުރިއެވެ. ވެރިކަމުގެ ކުރީކޮޅު ދެ ގައުމުގެ ދެމެދުގައި ބައެއް ދެބަސްވުންތައް އުފެދުނު ނަމަވެސް، މިހާރު ރާއްޖެއިން ދަނީ އިންޑިއާއާ އެކު އޮތް ގުޅުން އިތުރަށް ހަރުދަނާކުރުމަށް ގިނަގުނަ މަސައްކަތްތަކެއް ކުރަމުންނެވެ.