ރާއްޖޭގައި މިވަގުތު ކުރަމުންދާ ވިއްސާރައިގެ ތެރޭގައި މާލެއަށް ވެހުނު ބޯ ވާރޭގެ ސަބަބުން މާލޭގެ ގިނަ ސަރަހައްދުތަކެއް ވަނީ ފެން ބޮޑުވެފައެވެ.
މޫސުމާ ބެހޭ ގައުމީ އިދާރާގެ އޮފިޝަލަކު ހާމަކުރި ގޮތުގައި މިއަދު ހަވީރު 5 އިން 6 އަށް މާލެއަށް 60 މިލިމީޓަރުގެ ވާރޭ ވެހުނެވެ. އަދި ފާއިތުވި 24 ގަޑިއިރުގެ ތެރޭގައި މާލެއަށް 160 މިލިމީޓަރު އަދި ހުޅުލެއަށް 163 މިލިމީޓަރުގެ ވާރޭ ވެހިފައިވެއެވެ.
މި ބޯ ވާރޭގެ ސަބަބުން މާލޭގެ ގިނަ ގެތަކަކަށާއި ފިހާރަތަކަށް ވަނީ ފެންވަދެ، ގިނަ ގެއްލުންތަކެއް ލިބިފައެވެ. ފެން ބޮޑުވެފައިވާ ސަރަހައްދުތަކުން ފެންގަނޑު ހިއްކުމުގެ މަސައްކަތް ސިފައިންނާއި ފުލުހުން ގުޅިގެން މިހާރުވެސް ދަނީ ކުރަމުންނެވެ.
މެޓް އޮފީހުން މަޢުލޫމާތު ދެއްވި ގޮތުގައި ކުރިއަށް އޮތް 24 ގަޑިއިރުގެ ތެރޭގައިވެސް ރާއްޖޭގެ ގިނަ ސަރަހައްދުތަކަށް ވިއްސާރަ ކުރުމަކީ އެކަށީގެންވާ ކަމެކެވެ. އެހެންކަމުން މޫސުމަށް ސަމާލުވުމަށް އާންމުންނަށް އިލްތިމާސްކޮށްފައިވެއެވެ. ނަމަވެސް އާދިއްތަ ދުވަހުން ފެށިގެން މޫސުން ރަނގަޅުވާނެ ކަމަށް މެޓް އޮފީހުން ލަފާކުރެއެވެ.
