މި ސަރުކާރުން ކެބިނެޓުގެ މަގާމުތަކަށް ގެނެސްފައިވާ ބަދަލުތަކަކީ ވެރިކަން އިތުރަށް ހަރުދަނާ ކުރުމަށްޓަކައި ދިރާސާތަކެއް ކުރުމަށްފަހު ގެނެވުނު ބަދަލުތަކެއް ކަމުގައި ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ދައުލަތުގެ މީޑިއާއިން ގެނެސްދިން "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން، އަބްދުއްރަހީމް ވިދާޅުވީ ވެރިކަމަކީ ރައްޔިތުންނަށް ޚިދުމަތް ކުރުމަށް އަންނަ އެއްޗެއް ކަމަށާއި، ރައްޔިތުންނަށް އެންމެ ފަސޭހައިން ޚިދުމަތް ލިބޭނެ ގޮތަށް ކަންކަން އިންތިޒާމު ކުރުމަކީ ވެރިމީހާގެ ޒިންމާއެއް ކަމުގައެވެ.
އިދިކޮޅު ފަރާތްތަކުން ވިދާޅުވާ ފަދައިން މިނިސްޓަރުން ވަކިކުރަނީ ސަރުކާރު "އަންސްޓޭބަލް" ވެގެން ނޫން ކަމަށާއި، އެއީ ސަރުކާރު ހަރުދަނާކޮށް ރައްޔިތުންނަށް އެކަށީގެންވާ ގޮތުގައި ޚިދުމަތް ފޯރުކޮށްދިނުމަށް ކުރާ ކަމެއް ކަމުގައި އޭނާ ވިދާޅުވިއެވެ. އަދި މި ފަދަ ބަދަލުތައް ގެނައުމުގެ އިޚްތިޔާރު ޤާނޫނު އަސާސީން ރައީސުލްޖުމްހޫރިއްޔާއަށް ދީފައިވާ ކަމަށް ފާހަގަކުރެއްވިއެވެ.
އެއްގޮތަަކަށް ވެސް މިއީ ސްޓޭބަލްވުމާއި ނުވުމާ ގުޅުން އޮތް ކަމެއް ނޫން. އެެހެން އެ ވިދާޅުވާ ބައެއް ބޭފުޅުންގެ ވެރިކަންތަކުގައި އެބަހުއްޓޭ ތިން ހަތަރު ވަޒީރުން އެއް ވުޒާރާއެއްގެ ބަދަލުވެގެން ގޮސްފައި އެ ބޭފުޅުންގެ ދައުރުގެ ތެރޭގައި.
އަބްދުއްރަހީމް ވިދާޅުވި އެވެ.
ކޮންގްރެސް ޕާޓީގެ ޗެއާޕާސަންގެ ހައިސިއްޔަތުން އަބްދުއްރަހީމް ވިދާޅުވީ، މަޤާމުތަކަށް ބަދަލު ގެނައުމަކީ އަލަށް ކުރާ ކަމެއް ނޫން ކަމަށާއި، ކުރީގެ ސަރުކާރުތަކުގައިވެސް އެއް ވުޒާރާއެއްގައި ތިން ހަތަރު ވަޒީރުން ބަދަލުވެފައިވާ ކަމަށެވެ. އަދި ބަދަލުތައް ނުގެނެސްފިނަމަ، އޭގެ ސަބަބުން ލިބޭނެ ގެއްލުންތަކެއް ހުންނާނެ ކަމަށް ވިދާޅުވިއެވެ.
މިނިސްޓްރީއެއް އެގޮތުގައި ހުރެގެން ހިނގަމުން ދިއުންތޯ އެންމެ ރަނގަޅީ، ނޫނީ އެ މިނިސްޓްރީގައި ހުރި މަސައްކަތްތައް ކަމާ ގުޅުންހުރި އެހެން މިނިސްޓްރީތަކަށް ހަދާފައި، އެ މިނިސްޓްރީ މަދުކޮށްލުންތޯ ސަރުކާރަށް އެންމެ ރަނގަޅީ. ދިރާސާތަކަށްފަހު އެކަން އެ ކުރައްވަނީ އެންމެ ރަނގަޅު ގޮތަށް ކުރައްވަން ވެގެން.
އަބްދުއްރަހީމް ވިދާޅުވި އެވެ.
މި ސަރުކާރުން މިހާތަނަށް ދެ ފަހަރެއްގެ މަތިން ކެބިނެޓަށް ބަދަލު ގެނެސްފައިވެއެވެ. ފުރަތަމަ ބަދަލު ގެނެވުނީ ފިނޭންސް މިނިސްޓަރު ޑރ. މުހައްމަދު ޝަފީގު އިސްތިއުފާ ދެއްވުމާ ގުޅިގެންނެވެ. ދެވަނަ ބަދަލު ގެނެވުނީ ހުސްވި މަހުގެ 26 ވަނަ ދުވަހު، ހައުސިން މިނިސްޓްރީ އުވާލައްވައި، އެ މިނިސްޓްރީގެ މަސައްކަތްތައް އެހެން މިނިސްޓްރީތަކަށް ބަދަލުކުރުމާ ގުޅިގެންނެވެ.
