ރާއްޖެއާއި ޗައިނާއާ ދެމެދު ވެފައިވާ ފްރީ ޓްރޭޑް އެގްރީމަންޓް (އެފްޓީއޭ) އަށް މިއަދުން ފެށިގެން އަމަލުކުރަން ފަށައިފިއެވެ. މި އެއްބަސްވުމަށް އަމަލުކުރަން ފެށުމާ ގުޅިގެން ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވީ، މިއީ ރާއްޖޭގެ ތާރީހުގައި ވަރަށް މުހިންމު ދުވަހެއްކަމަށެވެ.
މިނިސްޓަރ ސައީދު ވިދާޅުވިގޮތުގައި މި އެއްބަސްވުމުގެ ދަށުން، ދެ ގައުމުގެ މެދުގައި ކަރަންޓް އެކައުންޓް މުއާމަލާތްތަކާއި ސީދާ އިންވެސްޓްމަންޓްތައް ދެގައުމުގެ ފައިސާއިން ހިންގުމުގެ އޮނިގަނޑެއް ޤާއިމުކުރެވި، ވިޔަފާރިއާއި އިންވެސްޓްމަންޓްގެ ގުޅުންތައް އިތުރަށް ހަރުދަނާވެގެންދާނެއެވެ. އަދި 2024 ވަނަ އަހަރުގެ ޖެނުއަރީ މަހު ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި، ދެޤައުމުގެ ދެމެދުގައި އޮތް ގާތް ގުޅުމުގެ އާ ބާބެއް ފެށިގެން ދިޔަކަމަށާއި، މި ގުޅުން އިތުރަށް ބަދަހިކުރުމާ ބެހޭގޮތުން މަޝްވަރާކުރެވުނު ކަމަށްވެސް ފާހަގަކުރެއްވިއެވެ.
މި އެއްބަސްވުމުގެ ދަށުން، ގިނަ މުއާމަލާތްތަކެއް ޑޮލަރުގެ ބަދަލުގައި ދިވެހި ރުފިޔާއިން ކުރެވޭނެއެވެ. މީގެ ތެރޭގައި ދިވެހިން ޗައިނާއަށް ކުރާ ދަތުރުފަތުރާއި، އެގައުމުން ހޯދާ ހިދުމަތްތަކަށް ފައިސާ ދެއްކުމާއި، މުދާ ގަތުން ހިމެނެއެވެ. އަދި ވިޔަފާރިވެރިންނާއި ޗުއްޓީ ހޭދަކުރުމަށް ޗައިނާއަށް ދާ ދިވެހިންނަށް ޑޮލަރުގެ ބަދަލުގައި ދިވެހި ރުފިޔާއިން މުއާމަލާތްކުރުމުގެ ފުރުސަތު ލިބިގެންދާނެއެވެ.
މީގެ އިތުރުން، ޗައިނާއިން ރާއްޖެއަށް އެތެރެކުރާ މުދަލުގެ 91 އިންސައްތަ ބާވަތުން އިމްޕޯޓް ޑިއުޓީ ދައްކަން ނުޖެހޭނެކަމަށް މިނިސްޓަރ ސައީދު ވަނީ ވިދާޅުވެފައެވެ. އަދި ޑިއުޓީ ނުދައްކައި، ދިވެހި ރުފިޔާއިން ޗައިނާއިން މުދާ ގަނެވުމުން، ދިވެހި ވިޔަފާރިތަކަށް ވަރަށް ބޮޑު ލުޔެއް ލިބޭނެ ކަމަށާއި، ޓެރިފް ލައިން ސުމަކަށް ދިއުމާ ގުޅިގެން ޗައިނާއިން ރާއްޖެއަށް އެތެރެކުރާ ތަކެތީގެ އަގުތައްވެސް ހެޔޮވެގެންދާނެ ކަމަށް އޭނާ ވަނީ ފާހަގަކުރައްވާފައެވެ.
