މާލޭގެ ގެއެއްގެ ބޮންޑެޑް ވެއާހައުސްއަކުން ސިނގިރޭޓް ކާޓޫނުތަކެއް މަދުވެގެން ފުލުހުން ތަހުގީގެއް ފަށައިފިއެވެ. ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމަށްފަހު މަދުވެފައިވާ މި ސިނގިރޭޓްތަކުގެ ތެރޭގައި 575 ކޭސް ނުވަތަ 34،000 ކާޓޫނު ހިމެނޭކަމަށް މީޑިއާތަކުން ވަނީ ރިޕޯޓުކޮށްފައެވެ. މި ސިނގިރޭޓްތަކަށް ދައްކަންޖެހޭ ކަސްޓަމްސް ޑިއުޓީގެ އަދަދު 47 މިލިއަން ރުފިޔާއަށް އަރާކަމަށް މައުލޫމާތު ލިބެއެވެ.
މިކަމާ ގުޅިގެން ދާހިލީ ވަޒީރު އަލީ އިހްސާން އެކްސްގައި ވިދާޅުވެފައިވަނީ، ވެއާހައުސްގެ ވެރިފަރާތުން އެތަން ދޫކޮށް އެހެން މަސައްކަތެއް ކުރަމުންދާކަމުގެ މައުލޫމާތު ލިބުމާ ގުޅިގެން އެކަން ބަލައި، ވެއާހައުސްގައި ހުރި ޑިއުޓީ ދައްކަންޖެހޭ މުދަލަށް ޑިއުޓީ ދެއްކުމަށް އެފަރާތަށް އަންގާފައިވާ ކަމަށެވެ. އަދި ކަސްޓަމްސްއަށް އެންގުމަކާ ނުލައި މިކަން ކޮށްފައިވާތީ، ކަސްޓަމްސްއާއި ފުލުހުން ގުޅިގެން މައްސަލަ ތަހުގީގުކުރަމުންދާ ކަމަށްވެސް އޭނާ ވިދާޅުވިއެވެ.
ވަޒީރު އިތުރަށް ވިދާޅުވީ، ގޭގޭގައި މުދާ ބޮންޑުކުރުމަކީ ސަލާމަތީގޮތުން ރައްކާތެރި ގޮތެއް ނޫންކަމަށް ފެންނާތީ، މިހާރު ސަރުކާރުން ވަނީ ބޮންޑެޑް ވެއާހައުސްތައް ހިންގުމުގެ އުސޫލުތައް ހަރުދަނާކޮށްފައެވެ. އެގޮތުން މިހާރު ބޮންޑެޑް ވެއާހައުސްތައް ހިންގޭނީ ހަމައެކަނި ކަސްޓަމްސްގެ ފުރިހަމަ ބެލުމުގެ ދަށުގައިވާ ސަރަހައްދުތަކުގައި ކަމަށް ކަނޑައަޅައި، އެ އުސޫލަށް އަމަލުކުރަމުންދާކަމަށް އޭނާ ވަނީ ފާހަގަކުރައްވާފައެވެ.
