ރާއްޖޭގައި ޗުއްޓީ ހޭދަކުރަމުން ދަނިކޮށް ޖަޕާނުގެ ގާނޫނު ހަދާ މަޖިލީހުގެ މެމްބަރެއް އިއްޔެ ހެނދުނު ނިޔާވެއްޖެއެވެ. ނިޔާވި މެމްބަރަކީ ޓޮޝިޔުކި އަޑާޗިއެވެ. އޭނާ ނިޔާވެފައިވަނީ އާއިލާއާއެކު ރާއްޖޭގައި ޗުއްޓީ ހޭދަކުރަމުން ދަނިކޮށް ސްނޯކްލިންގ ކުރުމަށް ދިޔުމަށްފަހުއެވެ.
މިހާދިސާއާ ގުޅިގެން ފުލުހުން މައުލޫމާތު ދެމުން ބުނެފައިވަނީ، އިއްޔެ ހެނދުނު 8:33 ހާއިރު ޅ. އަތޮޅުގެ ރިސޯޓެއްގައި 70 އަހަރުގެ ޖަޕާނު ފަތުރުވެރިއެއްގެ ހަށިގަނޑު މޫދުން ފެނުނު ކަމަށެވެ. އެހެންނަމަވެސް މަރުވި ފަރާތުގެ އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.
މިވަގުތު އަޑާޗިގެ ހަށިގަނޑު ޖަޕާނަށް ގެންދިއުމުގެ މަސައްކަތް އާއިލާއާއި ކަމާބެހޭ ފަރާތްތަކުން ކުރަމުންދާކަން މި ނޫހަށް ކަށަވަރުވެފައިވެއެވެ.
