އިސްލާމީ މަރުކަޒުގައި ރައީސް ޑރ. މުހައްމަދު މުއިއްޒު ހުކުރު ނަމާދުގައި ބައިވެރިވެވަޑައިގެންނެވި މަންޒަރު ދައްކުވައިދޭ ފޮޓޯއަކާ ގުޅުވައިގެން ސޯޝަލް މީޑިއާގައި ދެކެވެމުންދިޔަ ވާހަކަތަކަށް އިސްލާމިކް މިނިސްޓަރ ޑރ. ޝަހީމް ރައްދު ދެއްވައިފިއެވެ.
މި މައްސަލައިގައި ފާޑުކިޔާ ފަރާތްތަކުން ފާހަގަކޮށްފައިވަނީ، ރައީސް މުއިއްޒު ވަކިން އިންނަވާ މަންޒަރާއި، އެމަނިކުފާނުގެ ވަށައިގެން ހުރި ޖާގަތައް ހުސްކޮށް ހުރި މަންޒަރެވެ. ބައެއް ދީނީ އިލްމުވެރިންނާއި ވާދަވެރި ފަރާތްތަކުން ބުނެފައިވަނީ މިސްކިތުގައި އެންމެން ހަމަހަމަވާންޖެހޭނެ ކަމަށާއި، މިކަމުން ރާއްޖެ އަނެއްކާވެސް ރަސްކަމަކަށް ދާކަމުގެ އިޝާރާތެއް ފެންނަ ކަމަށެވެ.
ނަމަވެސް މި ފާޑުކިއުންތަކަށް ރައްދު ދެއްވަމުން މިނިސްޓަރު ޝަހީމް ވިދާޅުވެފައިވަނީ މި ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ. ޑރ. ޝަހީމް ސާފުކޮށްދެއްވި ގޮތުގައި ފޮޓޯގައި ފެންނަ ހުސް ޖާގަތަކަކީ މަރުކަޒުގެ އިމާމުންނާއި ބަންގިގޮވާ ފަރާތްތަކަށް ޚާއްޞަކުރެވިފައިވާ ޖާގަތަކެކެވެ. އެ ބޭފުޅުން ގަޑިއަށް ނިކުމެވަޑައިގަންނަވާ ކަމަށާއި، ރައީސް މުއިއްޒު އެއްވެސް އިރެއްގައި ޖާގަ ހުސްކުރުމަށް އަންގަވާފައި ނުވާކަން ޝަހީމް ފާހަގަކުރެއްވިއެވެ.
ތި ފޮޓޯގައި ހުސްކޮށް ތިފެންނަ ޖާގަ ތަކަކީ މަރުކަޒުގެ އިމާމުންނާއި ބަންގިގޮވާ މީހުންގެ ޖާގަ. އެބޭފުޅުން ގަޑިއަށް ނިކުންނަވަނީ.
ފޮޓޯގެ ހަގީގަތް ސާފުކޮށް ދެއްވަމުން މިނިސްޓަރު ވިދާޅުވެފައި ވެއެވެ.
އިސްލާމީ މަރުކަޒުގައި އާންމު އުސޫލެއްގެ ގޮތުން ކުރީ ސަފުގެ ދެތިން ޖާގަ އިމާމުންނަށް ޚާއްޞަކޮށް ހުސްކޮށް ބެހެއްޓުމަކީ އާދަވެފައިވާ ކަމެކެވެ. އަދި ނަމާދު ވަގުތު ޖެހެންދެން އިމާމުން މަޑުކުރެއްވުމަށް ވަކި ކޮޓަރިއެއްވެސް ހުންނަ ކަމަށް މިނިސްޓަރު ހާމަކުރެއްވިއެވެ.
