ކުރީގެ ހޯމް މިނިސްޓަރު އުމަރު ނަސީރު ވަނީ 2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެ ކަމަށް އިޢުލާނު ކުރައްވައިފިއެވެ. އެސްއެސްޓީވީގެ ޕްރޮގްރާމެއްގައި ވާހަކަފުޅު ދައްވަމުން އުމަރު ވިދާޅުވީ މި އިންތިޚާބު ކާމިޔާބު ކުރައްވައި، ޤައުމު އެއްކޮށް ބަދަލު ކުރައްވާނެ ކަމަށެވެ.
އުމަރު ނަސީރަކީ ކުރިން ދެ ފަހަރެއްގެ މަތިން ރިޔާސީ އިންތިޚާބުގައި ވާދަކުރައްވާފައިވާ ބޭފުޅެކެވެ. އޭގެ ތެރެއިން އެންމެ ފުރަތަމަ ފަހަރު ވާދަކުރެއްވީ އިސްލާމިކް ޑިމޮކްރެޓިކް ޕާޓީ (އައިޑީޕީ)ގެ ފަރާތުން 2008 ވަނަ އަހަރުގައެވެ. އަދި އޭނާގެ އެންމެ ފަހުގެ ވާދަ ކުރެއްވީ އަމިއްލަ ގޮތުންނެވެ.
އުމަރު ވިދާޅުވި ގޮތުގައި، 2028 ވަނަ އަހަރު އަންނައިރު ދިވެހި ރައްޔިތުންނަށް ސިޔާސީ ޕާޓީތަކުގެ ޙަޤީޤީ ސިފަ އެނގިވަޑައިގަންނަވާނެއެވެ. އަދި ސިޔާސީ މައިދާނުގައި މިހާރު މީހުން ބައްލަވަނީ ތެދުވެރިކަމާއި އަމާނާތްތެރިކަމަށް ކަމަށާއި، މީހަކު ވަކި ޕާޓީއެއްގައި ހުރުމަށް ނޫން ކަމަށް އޭނާ ވިދާޅުވިއެވެ.
އެހެންވީމަ 2028 ވަނަ އަހަރަކީ އަޅުގަނޑު ދެކޭ ގޮތުގައި އަޅުގަނޑު ކާމިޔާބުކުރާނެ އަހަރު. އަދި އަޅުގަނޑު މުޅި ގައުމު އެއްކޮށް ބަދަލުކޮށްލުމުގެ ވަރަށް ބޮޑު ރެވޮލިއުޝަރީ ފެށުމަކަށް ވާނެ އަހަރު.
އުމަރު ވިދާޅުވި އެވެ.
އުމަރުގެ ވިސްނުމުގައި 2028 ގެ އިންތިޚާބަކީ އިންޤިލާބީ ބަދަލުތަކެއްގެ ފެށުމަކަށް ވެގެންދާނެ އަހަރެކެވެ. މި ގޮތުން، ރާއްޖެއިން ކޮރަޕްޝަން ނައްތާލައްވާނެ ކަމަށާއި، އިސްލާމީ ޝަރީޢަތުގެ ހުކުމްތައް ކޮރަޕްޝަނާއި، މަސްތުވާތަކެއްޗާއި، މީހުން މެރުމާ ދެކޮޅަށް ތަންފީޒު ކުރައްވާނެ ކަމަށްވެސް އޭނާ ވިދާޅުވިއެވެ. މި ހުރިހާ ކަމަކާ އެކު ރާއްޖެ އެއްކޮށް ބަދަލުވެގެންދާނެ ކަމުގެ ޔަޤީންކަން އުމަރު ވަނީ ދެއްވާފައެވެ.
