ހަނިމާދޫ އިންޓަރނޭޝަނަލް އެއަރޕޯޓްގެ ފަސިންޖަރ ޓާމިނަލްގެ މަސައްކަތް ދަނީ ބާރު ދުވެލީގައި ކުރިއަށްކަމަށާއި، މުޅި މަޝްރޫޢުގެ މަސައްކަތް ނިމި، އަންނަ އަހަރުގެ މެދުތެރޭގައި އެއަރޕޯޓް ހުޅުވޭނެ ކަމަށް ރީޖަނަލް އެއަރޕޯޓްސް ކުންފުނިން ހާމަކޮށްފިއެވެ. މި އެއަރޕޯޓަކީ އަހަރަކު 1.3 މިލިއަން ފަތުރުވެރިންނަށް ޚިދުމަތް ދެވޭ ފެންވަރަށް ތަރައްޤީކުރެވޭ އެއަރޕޯޓެކެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން ރީޖަނަލް އެއަރޕޯޓްސް ކުންފުނީގެ މެނޭޖިން ޑިރެކްޓަރ އަހުމަދު މުބީން ވިދާޅުވީ މިހާރު އެއަރޕޯޓް މަޝްރޫޢުގެ 77 އިންސައްތަ މަސައްކަތް ވަނީ ނިމިފައި ކަމަށެވެ. އޭގެ ތެރޭގައި ކާގޯ ޓާމިނަލްގެ 90 އިންސައްތަ އަދި އެއަރޕޯޓް ޓަވަރުގެ 88 އިންސައްތަ މަސައްކަތް ހިމެނެއެވެ.
މުބީން އިތުރަށް ހާމަކުރެއްވި ގޮތުގައި ގްރައުންޑް ހޭންޑްލިންގއަށް ބޭނުންވާ ސާމާނުތައް ވަނީ ގެނެވިފައެވެ. އަދި އެއަރޕޯޓުގައި އައު ވެހިކަލްތައް ބޭނުންކުރެވޭނެއެވެ. މީގެއިތުރުން ތެޔޮ އެޅުމަށް ފިއުލް ޖެޓީއާއި ސްޓޯރޭޖް ޤާއިމްކުރެވޭނެއެވެ. އެމަނިކުފާނު ފާހަގަކުރެއްވި ގޮތުގައި މިއީ ފޮރިން ކުންފުނިތަކުން ކުރަމުންދާ މަސައްކަތްތަކުގެ ތެރެއިން ވަރަށް ރަނގަޅަށް ކުރިއަށްދާ މަޝްރޫޢެކެވެ.
2023 ވަނަ އަހަރުގެ ޖެނުއަރީ މަހު ފެށުނު މި މަޝްރޫޢުގެ ދަށުން ތަރައްޤީކުރި 2465 މީޓަރުގެ ދިގު ރަންވޭގެ މަސައްކަތް މިހާރު ވަނީ ނިމިފައެވެ. އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކޮށްގެން ކުރިއަށްގެންދާ މި މަޝްރޫޢުގައި ރަންވޭއާއި ޓަރމިނަލްގެ އިތުރުން ޔުޓިލިޓީ ބިލްޑިންގ، ފިއުލް ފާރމް އަދި އެއަރޕޯޓް ޖެޓީގެ މަސައްކަތްވެސް ހިމެނެއެވެ. އަދި ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކުރުމުގެ ދެވަނަ ފިޔަވަހީގެ ދަށުން ސީޕްލޭން ޓަރމިނަލެއް ތަރައްޤީކުރުމަށް ވަނީ ނިންމާފައެވެ.
