މޯލްޑިވްސް އިސްލާމިކް ބޭންކް (އެމްއައިބީ) އިން ކ. ތުލުސްދޫގައި އައު އޭޓީއެމް ސެންޓަރެއް ހުޅުވައިފިއެވެ. މި ސެންޓަރުގެ ޚިދުމަތާއެކު ތުލުސްދޫ ރައްޔިތުންނަށް 24 ގަޑިއިރު ވެސް ހުރިހާ ބޭންކިންގ ޚިދުމަތެއް ލިބެން ހުންނާނެކަމަށް އެމްއައިބީން މަޢުލޫމާތު ދީފައިވެއެވެ.
މި އޭޓީއެމް ސެންޓަރު އިފްތިތާހުކުރުމުގެ ރަސްމިއްޔާތުގައި އެމްއައިބީގެ ޗީފް ޑިޖިޓަލް އޮފިސަރު އަރީފާ ރަޙްމާން ޗޯދަރީއާއި ތުލުސްދޫ ކައުންސިލްގެ ރައީސް އަދި ނައިބު ރައީސް ބައިވެރިވެވަޑައިގެންނެވިއެވެ. އެމްއައިބީން ބުނާގޮތުގައި މި އަލަށް ތަޢާރަފުކުރެވުނު އޭޓީއެމްގައި ފައިސާ ޖަމާކުރުމާއި ނެގުމުގެ ޚިދުމަތް ހިމެނޭގޮތަށް ގިނަ ޚިދުމަތްތަކެއް ލިބެން ހުންނާނެއެވެ.
މީގެއިތުރުން، މި ޒަމާނީ ބޭންކިންގ މެޝިނަކީ ވިސާ އަދި މާސްޓަރކާޑްގެ ހުރިހާ ޑެބިޓް އަދި ކްރެޑިޓް ކާޑުތަކާ ގުޅޭ މެޝިނެއް ކަމުން، ދިވެހިންނާއި ފަތުރުވެރިންނަށް ވެސް އެއްވެސް ދަތިކަމެއްނެތި ބޭންކިންގ ތަޖުރިބާ ލިބިގެންދާނެ ކަމަށް އެމްއައިބީން ފާހަގަކޮށްފައިވެއެވެ.
އިފްތިތާހީ ރަސްމިއްޔާތުގައި ވާހަކަފުޅު ދައްކަވަމުން، އެމްއައިބީގެ ޑިޖިޓަލް އޮފިސަރު އަރީފާ ރަޙްމާން ޗޯދަރީ ވަނީ މި ސެންޓަރު ހުޅުވުމާމެދު އުފާފާޅުކުރައްވައި، ތުލުސްދޫ ފަދަ ރަށްރަށަށް އެމްއައިބީގެ ޚިދުމަތްތަކުގެ ނެޓްވޯކް ފުޅާކުރުމުގެ މުހިންމުކަން ފާހަގަކުރައްވާފައެވެ. އަދި މި އައު އޭޓީއެމްއަކީ ޚިދުމަތް ނުލިބޭ ސަރަޙައްދުތަކުގައި ދިރިއުޅޭ ރައްޔިތުންނަށް އިތުބާރުހުރި، ރައްކާތެރި އަދި ފަސޭހަ ބޭންކިންގ ޙައްލުތައް ފޯރުކޮށްދިނުމަށް އެމްއައިބީން ކުރާ މަސައްކަތުގެ ބައެއްކަމުގައި ވިދާޅުވިއެވެ.
އެމްއައިބީން ބުނާގޮތުގައި މުޅި ރާއްޖޭގައި އޭޓީއެމް ނެޓްވޯކް ފުޅާވަމުންދާއިރު، މިއީ ޑިޖިޓަލް ބޭންކިންގގެ އައު ޙައްލުތައް ފޯރުކޮށްދިނުމާއި، މާލީ ޝުމޫލިއްޔަތު ކުރިއެރުވުމާއި، ބޭންކިންގ ޚިދުމަތްތައް އެންމެންނަށް ލިބޭނެ މަގު ތަނަވަސްކޮށްދިނުމަށް ބޭންކުން ކުރާ މަސައްކަތުގެ ހެއްކެކެވެ.
