ކީރިތި ޤުރުއާން ހިތުދަސްކުރާ ފަރާތްތަކަށް ސަނަދު ދިނުމަށް ކޮންމެ އަހަރެއްގެ ރަމަޟާން މަހު ޚާއްސަ ހަފްލާއެއް ބޭއްވުމަށް ނިންމާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވެފައިވަނީ މި ހަފްލާ ބާއްވާނީ ކޮންމެ އަހަރެއްގެވެސް ރަމަޟާން މަހުގެ 27 ވިލޭރޭގައި ކަމަށެވެ. އަދި މި ދަސްވެނިވުމުގެ ހަފްލާގައި ބޭނުންކުރާނެ ޚާއްސަ ޤައުނެއް ތައްޔާރުކުރެވޭނެ ކަމަށާއި، ފުރަތަމަ ހަފްލާ ބޭއްވުމަށް ހަމަޖެހިފައިވަނީ ކުރިއަށް އޮތް ރަމަޟާން މަހުގެ 27 ވިލޭރޭގައި ކަމަށްވެސް އޭނާ ވަނީ ހާމަކުރައްވާފައެވެ.
ރާއްޖޭގައި ޙާފިޡުންގެ އަގުވަޒަންކުރުމަށް ރައީސުލްޖުމްހޫރިއްޔާގެ ޚާއްސަ މެޑެއްޔާއި ހަނދާނީ ލިޔުމާއި އިނާމު ދެއްވަމުން ގެންދަވައެވެ. މިގޮތުން، 2022 ވަނަ އަހަރުގެ އޮކްޓޯބަރު މަހުން ފެށިގެން 2024 ވަނަ އަހަރުގެ ސެޕްޓެންބަރު މަހުގެ 1 ވަނަ ދުވަހާ ހަމައަށް، ޤުރުއާން ހިތުދަސްކޮށް ސަނަދު ހާސިލުކުރި 28 ޙާފިޡުންނަށް މިއަހަރު ވަނީ މެޑެއްޔާއާއި ހަނދާނީ ލިޔުމާއި އިނާމު އަރުވާފައެވެ.
ވަޒީރު އިތުރަށް ހާމަކުރެއްވި ގޮތުގައި މިހާރުވެސް ތިން ބޭކަލަކު ވަނީ ޤުރުއާން ހިތުދަސްކުރުމަށްފަހު އިމްތިހާނު ހަދަމުންނެވެ. އަދި އިތުރު ދެ ބޭކަލަކު އިމްތިހާނު ހެދުމަށް އެދިފައިވާ ކަމަށާއި، ފަސް އަހަރުގެ ކުޑަކުއްޖަކުވެސް ވަނީ ޤުރުއާން ހިތުދަސްކުރުމަށްފަހު މުރާޖަޢާކުރުމަށް އެދިފައެވެ. މީގެއިތުރުން، ސަރުކާރުން ވަނީ ކީރިތި ޤުރުއާން ހިތުދަސްކުރާ ފަރާތްތައް އުމްރާއަށް ފޮނުވުމުގެ މަޝްރޫޢެއްވެސް މިއަހަރު ތަޢާރަފުކުރައްވާފައެވެ.
