ވެލާނާ އިންޓަނޭޝަނަލް އެއާޕޯޓުގައި ހިނގި ހަމަނުޖެހުމެއްގެ މައްސަލަ ފުލުހުން ބަލަން ފަށައިފިއެވެ. ފުލުހުން މީޑިއާތަކާއި ހިއްސާކުރި މެސެއްގައި ބުނެފައިވަނީ މިމައްސަލަ ފުލުހުންނަށް ރިޕޯޓު ކޮށްފައިވަނީ މިއަދު މެންދުރުފަހު 3:15 ގައި ކަމުގައެވެ.
ސޯޝަލް މީޑިއާގައި ފެތުރިފައިވާ ވީޑިއޯތަކުން ދައްކާ ގޮތުގައި މި ހަމަނުޖެހުން ހިނގާފައިވަނީ ފިރިހެނުންތަކެއްގެ މެދުގައެވެ. އަދި އެއީ ސްރީލަންކާގެ ބައެއް ކަމަށް ބައެއް ފަރާތްތަކުން ބުނެއެވެ. ނަމަވެސް މި ހަމަނުޖެހުން ހިނގަން ދިމާވި ސަބަބެއް އަދި ސާފުވެފައެއް ނުވެއެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިވޭތޯ ވެސް އަދި ކަށަވަރެއް ނުވެއެވެ.
މި މައްސަލަ ދިމާވެފައިވަނީ މީގެ ކުރިން، މި މަހުގެ 6 ވަނަ ދުވަހު މާލޭ އާޓިފިޝަލް ބީޗް ސަރަހައްދުގައި ބިދޭސީންތަކެއް މާރާމާރީ ހިންގި މައްސަލައަށް ފަހުގައެވެ. އެ މައްސަލައިގައި އިސްކޮށް އުޅުނު މީހާ މިހާރު ވަނީ ރާއްޖެއިން ޑިޕޯޓްކޮށްފައެވެ.
