ރާއްޖޭގައި އިންޑޮނޭޝިއާގެ އަންހެނަކު ރޭޕްކޮށް މަރާލާފައިވާ ކަމަށް ބުނެ ފެތުރެމުންދާ ވާހަކަތައް ހޯމްލޭންޑް އެންޑް ސެކިއުރިޓީ މިނިސްޓަރު އަލީ އިހުސާން ރޭ ދޮގު ކޮށްފިއެވެ.
ރޭ ސޯޝަލް މީޑިއާގައި ބިދޭސީ އަންހެނަކު ރާއްޖޭގައި މަރާލާފައިވާ ކަމަށް ބުނާ ވާހަކަތަކެއް ދައުރުވާން ފެށުމާއެކު، އެ ހާދިސާއާ ގުޅޭ ވީޑިއޯއެއް ވެސް އޮތް ކަމަށް ބުނާ ވާހަކަތަކެއް ވަނީ ފެތުރިފައެވެ.
މި މައްސަލައާ ގުޅިގެން ނޫސްވެރިން ފުލުހުންގެ މީޑިއާ ގްރޫޕުގައި ސުވާލު އުފައްދަމުންދަނިކޮށް، މިނިސްޓަރު އިހުސާން އޭނާގެ ރަސްމީ 'އެކްސް' އެކައުންޓުން ކުރެއްވި ޕޯސްޓެއްގައި ވިދާޅުވެފައިވަނީ، މި ވާހަކަތަކާއެކު ދައުރުވަމުންދާ ވީޑިއޯއަކީ 2021 ވަނަ އަހަރުގެ މޭ މަހު ބަންގްލަދޭޝްގެ ނޫހަކުން ރިޕޯޓްކޮށްފައިވާ ހާދިސާއަކާ ގުޅޭ ވީޑިއޯއެއް ކަމަށެވެ. މިނިސްޓަރު އިހުސާން އެ އާޓިކަލްގެ ލިންކުވެސް ވަނީ ހިއްސާކުރައްވާފައެވެ. މީގެއިތުރުން، ދިވެހި ފުލުހުންގެ ޚިދުމަތުންވެސް ވަނީ ރާއްޖޭގައި މިފަދަ ހާދިސާއެއް ހިނގާފައި ނުވާކަން ކަށަވަރުކޮށްދެއްވާފައެވެ.
