މިމަހުގެ 19 ވަނަ ދުވަހު އދ ގެ އާންމު މަޖިލީހުން ފާސްކުރި، ފަލަސްތީނަށް ބޭނުންވާ އިންސާނީ އެހީ ފޯރުކޮށްދިނުމާއި ބެހޭގޮތުން އިޒްރޭލުން އުފުލަންޖެހޭ ޒިންމާތަކާ ބެހޭ އިންޓަނޭޝަނަލް ކޯޓް އޮފް ޖަސްޓިސްގެ އިސްތިޝާރީ ލަފައަކަށް އެދި ހުށަހެޅި ގަރާރަށް ދިވެހިރާއްޖެއިން ތާއީދުކޮށްފިއެވެ.
ފޮރިން މިނިސްޓްރީން ހާމަކުރިގޮތުގައި، ނޯވޭގެ އިސްނެގުމާއެކު އެހެން ގައުމުތަކެއް ހިމެނޭ ގްރޫޕަކުން ހުށަހެޅި މި ގަރާރު ދިވެހިރާއްޖެއިން ވަނީ ކޯ-ސްޕޮންސަރ ކޮށްފައެވެ. އަދި މި ގަރާރު ވަނީ ރާއްޖެ ހިމެނޭގޮތަށް 137 މެންބަރު ގައުމުގެ ވޯޓާއެކު ފާސްކޮށްފައެވެ.
ފޮރިން މިނިސްޓްރީން އިތުރަށް ބުނެފައިވާ ގޮތުގައި، މިއީ އދ އާއި ބައިނަލްއަޤްވާމީ ޖަމުޢިއްޔާތަކާއި އެހެން ޤައުމުތަކުން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތައް ދަމަހައްޓަން އެޅޭ މުހިންމު ފިޔަވަޅެކެވެ. އަދި މި ގަރާރަށް ލިބިފައިވާ ތާއީދަކީ 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް ފަލަސްތީނުގެ މިނިވަން އަދި ސިޔާދަތީ ދައުލަތެއް ގާއިމުކުރުމަށް ކުރެވެމުންދާ މަސައްކަތަށް ލިބިގެންދާ ބާރެއްކަމުގައި ދިވެހިރާއްޖެއިން ޤަބޫލުކުރާކަމަށް ފޮރިން މިނިސްޓްރީން ވަނީ ބުނެފައެވެ.
