މިދިޔަ ހޮނިހިރު ދުވަހު މާލެއަށް ކުރި ވިއްސާރައިން 30 ގެއަކަށް ގެއްލުން ލިބުނު ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން މިއަދު ހާމަކޮށްފިއެވެ.
އެންޑީއެމްއޭއިން 'އެކްސް’ގައި ޕޯސްޓްކުރި ބަޔާނުގައި ބުނެފައިވާ ގޮތުން، މި ވިއްސާރައާ ގުޅިގެން އެ އޮތޯރިޓީއާއި ފުލުހުންނާއި ސިފައިންނަށް އަދި ރެޑްކްރެސެންޓުގެ ހޮޓްލައިންތަކަށް ޖުމުލަ 98 ކޯލު ލިބިފައިވެއެވެ. އޭގެ ތެރޭގައި ވެލި ބަސްތާ ޖަހައިދިނުމަށް 70 ކޯލާއި، ގެއްލުންތައް ރިޕޯޓްކުރުމަށް 21 ކޯލާއި، ޒަރޫރީ އެހީތެރިކަމަށް އެދި ހަތް ކޯލު ހިމެނެއެވެ.
އެންޑީއެމްއޭއިން އިތުރަށް ފާހަގަކޮށްފައިވާ ގޮތުގައި މި ހާދިސާގައި ޑެމޭޖު އެސެސްމަންޓް ހަދަން ޖެހުނު 30 ގޭގެ އެސެސްމަންޓް މިހާރު ވަނީ ނިންމާފައެވެ. އެ އެސެސްމަންޓުން ދައްކާ ގޮތުގައި ގިނައީ ހިފައިގެން ގުޅޭ ތަކެއްޗަށް ލިބުނު ގެއްލުންތަކެވެ. އަދި ބައެއް ގޭގެ ސީލިންފަދަ އިމާރާތުގެ ބައެއް ތަންތަނަށްވެސް ގެއްލުން ލިބިފައިވާއިރު، މި ގެއްލުންތައް ހިސާބުކުރުމާއި އިތުރަށް ކަށަވަރު ކުރުމުގެ މަސައްކަތް ކުރިއަށްދާ ކަމަށް އެ އޮތޯރިޓީން ބުނެފައިވެއެވެ.
މީގެއިތުރުން، އަށް ގެއަކުން 32 މީހަކު ވަގުތީ ހިޔާވަހިކަމަށް ބަދަލުކުރަން ޖެހުނު ކަމަށާއި، އެ މީހުން މިހާރު ވަނީ އާންމު ހާލަތަށް ރުޖޫއަވެފައި ކަމަށްވެސް އެންޑީއެމްއޭއިން ހާމަކޮށްފައިވެއެވެ.
