މާލޭގެ ގެއެއްގެ ތެރެއިން މަރުވެފައި އޮތް މީހަކު ރޭ ފެނިގެން އެ މައްސަލަ ތަހުގީގު ކުރަމުން އަންނަ ކަމަށް ފުލުހުން މިއަދު ބުނެފި އެވެ.
ގަލޮޅުގައި ހުންނަ ގެއެއްގެ ތެރޭގައި ހަބަރު ހުސްވެފައި އޮތް މީހަކު ފެނިގެން ފުލުހުންނަށް ރިޕޯޓްކުރީ ރޭ ދަންވަރު 1:27 ހާއިރު އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ އެ މީހާ އައިޖީއެމްއެޗަށް ގެންދިޔަ އިރު ވެސް ވަނީ މަރުވެފައި ކަމަށާއި، މަރުވެފައި ވަނީ ދާއޫދު ޝިމްރީޒް، 45، ގ. ބިއުޓީ ވިލާ، ނަމަކަށް ކިޔާ މީހެއް ކަމަށެވެ. "މި މައްސަލަ ފުލުހުން ގެންދަނީ ތަހުގީގު ކުރަމުން،" ފުލުހުން ބުނެފައި ވެއެވެ.
ގަލޮޅުގައި ހުންނަ ގެއެއްގެ ތެރެއިން އިއްޔެ ހަވީރު ވެސް ވަނީ މަރުވެފައި އޮތް މީހަކު ފެނިފަ އެވެ. ނަމަވެސް، ރޭ މީހަކު ފެނުނީ އެހެން ގެއަކުން ކަމަށް ފުލުހުން މިއަދު ބުންޏެވެ.
