މޫސުމާ ބެހޭ ގައުމީ އިދާރާ، މެޓް އޮފީހުން ހާމަކުރި މަޢުލޫމާތުގައިވާ ގޮތުން ފާއިތުވި 24 ގަޑިއިރުގެ ތެރޭގައި ރާއްޖެއިން އެންމެ ގިނައިން ވާރޭ ވެހިފައިވަނީ މާލެއަށެވެ. މި މުއްދަތުގެ ތެރޭގައި މާލެއަށް 136.5 މިލިމީޓަރުގެ ވާރޭ ވެހިފައިވާއިރު، ހުޅުމާލެއަށް 117 މިލިމީޓަރު އަދި ބ. ދަރަވަންދޫއަށް 111 މިލިމީޓަރުގެ ވާރޭ ވެހިފައިވާކަން މެޓް އޮފީހުގެ ރެކޯޑުތަކުން ދައްކައެވެ.
މެޓް އޮފީހުން ފާހަގަކުރި ގޮތުގައި މިހާރު މިވަނީ ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރާ ދިމާވެފައެވެ. މި ދުވަސްވަރަކީ އާންމުކޮށް ކޮޅިގަނޑުތައް އުފެދޭ މޫސުމެކެވެ. މިވަގުތު ރާއްޖެއާ ކައިރީގައި ދެ ކޮޅިގަނޑެއް އުފެދިފައިވާތީ، މި ދުވަސްތަކުގައި މޫސުން ގޯސްވާނެ ކަމަށް މެޓް އޮފީހުން ވަނީ އިންޒާރު ދީފައެވެ.
މާލޭގައި ރޭގެ ވަގުތުތަކުން ފެށިގެން ބޯކޮށް ވެހުނު ވާރޭގެ ސަބަބުން ފެންބޮޑުވުމާ ގުޅިގެން، އެމްއެންޑީއެފްގެ ސިފައިން ވަނީ މަގުތަކުގައި ފެން ހިންދުމުގެ މަސައްކަތް ފަށާފައެވެ. އަދި ގެތަކަށް ފެން ވަނުން ހުއްޓުވުމަށް ވެލި ބަސްތާ ޖެހުމުގެ މަސައްކަތްވެސް ސިފައިން ކުރަމުންދާ ކަމަށް އެމްއެންޑީއެފްއިން ބުނެފައިވެއެވެ. މި މަސައްކަތަށް ވެސްޓްޕާކު، އައިޖީއެމްއެޗް، ވިލިނގިލީ ފެރީ ޓާމިނަލް، ދިރާގު އަދި ޖެލީ ޕިއްޒާ ސަރަހައްދު ހިމެނޭ ފަސް ސަރަހައްދެއްގައި 16 ޕަމްޕު ބަހައްޓައިގެން މަސައްކަތް ކުރަމުންދެއެވެ.
މޫސުން ގޯސްވާނެކަމަށް ބެލެވޭތީ، މެޓް އޮފީހުން ވަނީ ހއ. އަތޮޅުން ފެށިގެން ތ. އަތޮޅާ ހަމައަށް ހުދު ސަމާލެއް ނެރެފައެވެ. މި ސަރަހައްދުތަކަށް ބޯކޮށް ވާރޭވެހި، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ކަނޑުވެސް ގަދަވާނެ ކަމަށް މެޓް އޮފީހުން ވަނީ ލަފާކޮށްފައެވެ.
