މާލެއަށް ވެހުނު ބޯ ވިއްސާރައިގެ ސަބަބުން ރައްޔިތުންނަށް ދަތިތަކާ ކުރިމަތިލާން ޖެހިއްޖެއެވެ. މެޓް އޮފީހުގެ ރިޕޯޓުތަކުން ދައްކާގޮތުގައި އިއްޔެ ހެނދުނު 8 ގަޑިން މިއަދު ހެނދުނު 8 ގަޑިއަށް 136.5 މިލިމީޓަރުގެ ވާރޭ މާލެއަށް ވެހިފައިވެއެވެ. މިއީ މި މުއްދަތުގެ ތެރޭގައި ރާއްޖޭގެ އެހެން ރަށްތަކާ އަޅާބަލާއިރު އެންމެ ގިނައިން ވާރޭ ވެހުނު ރަށެވެ.
މި ވިއްސާރައިގެ ސަބަބުން ވަކިން ޚާއްޞަކޮށް މާފަންނު ސަރަޙައްދުގައި ފެން ބޮޑުވެފައިވާތީ، ސިފައިންނާއި މާލެ ސިޓީ ކައުންސިލް ގުޅިގެން ފެން ހިންދުމުގެ މަސައްކަތް ވަނީ ފަށާފައެވެ. މި މަސައްކަތުގައި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީވެސް ވަނީ ބައިވެރިވެފައެވެ.
މެޓް އޮފީހުން ވަނީ މޫސުން ގޯސްވެދާނެކަމުގެ އިންޒާރު ދެމުން، މުޅި ރާއްޖެއަށް ވައިޓް އެލާޓެއް ނެރެފައެވެ. މިދިޔަ ބުދަ ދުވަހުން ފެށިގެން ފަސް ދުވަހުގެ މުއްދަތަށް މުޅި ރާއްޖޭގެ މޫސުން ގޯސްވެދާނެ ކަމަށް އެ އޮފީހުން ވަނީ އިންޒާރު ދީފައެވެ.
އަދި މި ދުވަސްވަރު ކަނޑުދަތުރުފަތުރު ކުރާ ފަރާތްތަކަށް ޚާއްޞަ ސަމާލުކަމެއް ދިނުމަށް އިލްތިމާސްކޮށްފައިވެއެވެ.
މި ދުވަސްވަރަކީ ދެ މޫސުން ބައްދަލުވާ ދުވަސްވަރު ކަމަށްވާތީ، އާންމުކޮށްވެސް މޫސުން ގޯސްވާ ދުވަސްވަރެކެވެ. މެޓް އޮފީހުގެ ލަފާގައި މި ދުވަސްވަރު ވިލާގަނޑުގައި ވައިގެ ބާރުމިން ގަޑިއަކު 55 މޭލަށް އަރާފާނެ ކަމަށް ވަނީ އަންގާފައެވެ.
