މޫސުން ގޯސްވުމާ ގުޅިގެން މެޓް އޮފީހުން މިއަދު ހެނދުނު 8:45 އާ ހަމައަށް ށ. އަތޮޅުން ފެށިގެން ވ. އަތޮޅާ ހަމައަށް ހުރި އަތޮޅުތަކަށް ޔެލޯ އެލާޓެއް ނެރެފިއެވެ. މި އެލާޓް ދެމިއޮންނަ ވަގުތުތަކުގައި ބޯކޮށް ވާރޭވެހި، ގުގުރާނެ ކަމަށް މެޓް އޮފީހުން ވަނީ އަންގާފައެވެ.
މެޓް އޮފީހުން މަޢުލޫމާތު ދެމުން ބުނެފައިވަނީ ކުރިއަށް އޮތް ހަފްތާ ބަންދުގައި ރާއްޖޭގެ ހުރިހާ ސަރަހައްދެއްގައިވެސް މޫސުން ގޯސްވެދާނެ ކަމަށް ލަފާކުރެވޭތީ، އާންމުން މިކަމަށް ސަމާލުކަން ދިނުމަށް އިލްތިމާސްކުރާ ކަމަށެވެ. މިގޮތުން މިއަދު އުތުރުގެ ރަށްތަކަށް ގުގުރުމާއެކު ވިއްސާރަވެހި، އަދި ރާއްޖޭގެ އެހެން ސަރަހައްދުތަކަށް ގަދަ ވަޔާއެކު ވިއްސާރަވެހޭނެ ކަމަށް ވަނީ ލަފާކޮށްފައެވެ.
މެޓް އޮފީހުން އިތުރަށް ފާހަގަކޮށްފައިވަނީ މިހާރު މިއޮތީ ރާއްޖޭގެ ސަރަހައްދުން ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށާއި، މި ދުވަސްވަރަކީ ކޮޅިގަނޑުތައް އުފެދުމުގެ ފުރުސަތު އޮންނަ ދުވަސްވަރެއް ކަމަށެވެ.
