މަޖިލީހުގެ ރައީސް އަބްދުލްރަހީމް އަބްދުﷲ އަށް އިންޑިއާގެ ގާނޫނު ހަދާ މަޖިލީހުގެ ތިރިގެ، ލޮކް ސަބާގެ ރައީސް ޝްރީ އޯމް ބިރްލާގެ ދައުވަތަކަށް، އަންނަ ފެބްރުއަރީ މަހުގެ 10 އިން 14 އަށް އިންޑިއާއަށް ދަތުރުފުޅެއް ކުރައްވަން ހަމަޖެހިއްޖެއެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީގެ ސްޓޭޓް މިނިސްޓަރު ޕަބިތުރާ މާގެރިޓާ ވިދާޅުވި ގޮތުގައި މި ދަތުރުފުޅުގައި މަޖިލީހުގެ ވަފުދެއްވެސް ބައިވެރިވެ ވަޑައިގަންނަވާނެއެވެ.
ދެ ގައުމުގެ ގާނޫނު ހަދާ މަޖިލީހުގެ މެދުގައި ގުޅުން އިތުރަށް ބަދަހިކުރުމުގެ މަގުސަދުގައި ކުރައްވާ މި ދަތުރަކީ މަޖިލީހުގެ ރައީސްކަމާ ހަވާލުވެވަޑައިގަތް ފަހުން އަބްދުލްރަހީމް އިންޑިއާއަށް ކުރައްވާ ފުރަތަމަ ދަތުރުފުޅެވެ. އަދި ފާހަގަކޮށްލެވެނީ މިދިޔަ އޮކްޓޫބަރު މަހު ސްވިޒަލޭންޑްގެ ޖެނީވާގައި ބޭއްވުނު އިންޓަރ-ޕާލަމެންޓަރީ ޔޫނިއަން (އައިޕީޔޫ) ގެ 149 ވަނަ އެސެމްބްލީގެ ތެރޭގައި އަބްދުލްރަހީމް ވަނީ ލޮކް ސަބާގެ ރައީސްއާ ބައްދަލުކުރައްވާފައެވެ.
