އެޗްޑީސީން ބިންވެރިޔާ ސްކީމްގައި ނުހިމެނޭ ފަރާތްތަކަށް ގޯތި ދިން ކަމަށް ތުހުމަތުކުރެވޭ މައްސަލައިގެ ތަހުގީގުގެ ތެރެއިން މިހާތަނަށް 6 މީހަކާ ސުވާލުކޮށްފައިވާކަމަށް ފުލުހުން ބުނެފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި، މި މައްސަލަ ފުލުހުންގެ ސަމާލުކަމަށް އައީ މީސް މީޑިއާ މެދުވެރިކޮށެވެ. އެހިސާބުން ފެށިގެން ފުލުހުންގެ ތަހުގީގު ޓީމުން ވަނީ ކަމާ ގުޅުންހުރި އޮފީސްތަކަށް ޒިޔާރަތްކޮށް މަޢުލޫމާތު ހޯދަން ފަށާފައެވެ.
ސުވާލުކުރެވުނު 6 މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ. އޭސީޕީ ޝަރީފް ހާމަކުރެއްވި ގޮތުގައި، އެޗްޑީސީ ޕޯޓަލްއަށް ސައްހަނޫން ލިޔެކިޔުން ހުށަހަޅާފައިވަނީ ތިން ބިމަކާ ގުޅޭގޮތުންނެވެ. މީގެ ތެރެއިން ދެ ބިމަކީ ބިންވެރިޔާ ސްކީމުން ޝަރުތު ހަމަވެގެން އެހެން ބަޔަކަށް ލިބިފައިވާ ބިންތަކެކެވެ. އަނެއް ބިމަކީ އެއްވެސް ފަރާތަކަށް ދީފައިވާ ބިމެއް ނޫންކަން ތަހުގީގަށް އެނގިފައިވެއެވެ.
ސުވާލުކުރެވުނު ފަރާތްތަކުގެ ތެރެއިން ބައެއް މީހުން ބުނެފައިވަނީ، އެ ލިޔުންތައް އެމީހުންނަށް ލިބިފައިވަނީ ކުރީގެ ސަރުކާރުގެ ދުވަސްވަރު ކަމަށެވެ. ޝަރުތު ހަމަނުވާ ކަމަށް ޝަކުވާ ހުށަހެޅުމުން، އޭރުގެ ހައުސިން މިނިސްޓްރީގެ އިސް ފަރާތެއް ކަމުގައިވާ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ބައްދަލުކޮށްފައިވާ ކަމަށް ތަހުގީގަށް މަޢުލޫމާތު ލިބިފައިވެއެވެ. ފަޒުލްގެ ބޭބެ ފަޒީލްވެސް އޭނާގެ ބަޔާނުގައި މިފަދައިން ބުނެފައިވާކަން ޝަރީފް ހާމަކުރެއްވިއެވެ.
ފުލުހުން އިތުރަށް މަޢުލޫމާތު ދެއްވި ގޮތުގައި، މިހާރު ވަނީ އެ މީހުންގެ އަތުގައި ހުރި ލިޔުންތައް ތަހުގީގަށް ނަގައި، ހައުސިން މިނިސްޓްރީން ލިބެންހުރި ޑިޖިޓަލް ލިޔުންތައް ހޯދައި، އެ ލިޔުންތަކުގެ ތަހުލީލު ފަށާފައެވެ.
