އެންޓި ކޮރަޕްޝަން ކޮމިޝަނުން މިއަދު އަވަސް ތަހުގީގެއް ފަށައިފިއެވެ. މި ތަހުގީގު އޭސީސީން ފެށީ "ބިންވެރިޔާ" އާއި "ގެދޮރުވެރިޔާ" ސްކީމަށް އެދި ފޯމު ބަލައިގަތުމުގަ އާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާ ޚިލާފަށް ޢަމަލުކޮށްފައިވާތީ ޕްރޮސިކިއުޓަރ ޖެނެރަލް އައްބާސް ޝަރީފް ކުރެއްވި އަމުރަކާ ގުޅިގެންނެވެ.
އޭސީސީން ނެރުނު ކުރު ބަޔާނެއްގައި ބުނެފައިވަނީ މި ތަހުގީގު ކުރިއަށް ގެންދަނީ ދިވެހި ފުލުހުންގެ ޚިދުމަތާ ގުޅިގެން ކަމަށެވެ. ޕްރޮސިކިއުޓަރ ޖެނެރަލްގެ އޮފީހުން ހާމަކުރި ގޮތުގައި މި ސްކީމްތަކުގެ ދަށުން ގޯއްޗާއި ފްލެޓް ދޫކުރުމުގައި ގަވާއިދާ ޚިލާފު ޢަމަލުތަކެއް ހިންގާފައިވާކަމުގެ ކަންބޮޑުވުން ޕްރޮސިކިއުޓަރ ޖެނެރަލްގެ ސަމާލުކަމަށް އައިސްފައިވެއެވެ.
ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ލިބިދޭ ބާރުގެ ދަށުން، މި ސްކީމްތަކުގެ މަސައްކަތް ފެށުނީއްސުރެ މިއަދާ ހަމައަށް ހިނގާފައިވާ އެންމެހައި ކަންކަމުގެ ތަހުގީގެއް ހިންގުމަށް ޕްރޮސިކިއުޓަރ ޖެނެރަލް ވަނީ އަމުރުކުރައްވާފައެވެ. އަދި މި މައްސަލައިގެ ތަޙުޤީޤު ހިނގަމުންދާ ގޮތް ކޮންމެ ހަފްތާއަކު އެއްފަހަރު އެ އޮފީހާ ހިއްސާކުރުމަށްވެސް އަންގަވާފައިވެއެވެ.
އެކްސްގައި ޕީޖީ އައްބާސް ޝަރީފް ވިދާޅުވެފައިވަނީ މި އަމުރު ކުރެއްވީ ގިނަ ރައްޔިތުންތަކެއްގެ ކަންބޮޑުވުންތަކެއް ހުރުމާއެކު، އެ ކަންބޮޑުވުންތަކަށް ޙައްލެއް ލިބޭނީ ފުރިހަމަ އަދި އަވަސް ތަޙުޤީޤެއް ހިންގައި، ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އެޅިގެން ކަމަށް ޤަބޫލުކުރެވޭތީއެވެ.
މި މައްސަލައާ ގުޅިގެން އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު ވިދާޅުވެފައިވަނީ ބިންވެރިޔާ ސްކީމުގެ ދަށުން ގޯތި ނުލިބޭ ފަރާތްތަކަށް ގޯތި ދިނުމުގެ ބާރު އެޗްޑީސީއަށް ލިބިފައިނުވާ ކަމަށާއި، ދައުރުވަމުންދާ ލިޔެކިޔުންތަކަކީ އެޗްޑީސީގެ ޕޯޓަލްއަށް ހުށަހެޅުނު ރިކުއެސްޓްތަކެއްގެ ލިޔެކިޔުންތައް ސައްހަތޯ ބެލުމަށް ހައުސިންގ މިނިސްޓްރީއާއެކު ކުރެވުނު މުއާމަލާތްތަކުގެ ލިޔެކިޔުންތަކެއް ކަމަށެވެ.
