ކުރީގެ ސަރުކާރުން ބިންވެރިޔާ ސްކީމްގެ ޝަރުތު ހަމަނުވާ ތިން ފަރާތަކަށް ބިން ދޫކޮށް، އެކަމުގެ ލިޔެކިޔުންތައް ދޫކޮށްފައިވާކަން ފާހަގަކުރެވިފައިވާކަމަށާއި އެ ލިޔުން ދޫކޮށްފައިވަނީ ކުރީ ސަރުކަރުންކަމަށް ފުލުހުން ބުނެފިއެވެ.
މި މައްސަލައާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ހާމަކުރި ގޮތުގައި، ސޯޝަލް މީޑިއާގައި ފެތުރެމުންދާ ލިޔުންތަކުގެ ސައްހަކަން ދެނެގަތުމަށް މަސައްކަތްކުރަމުންދެއެވެ. މި ލިޔުންތަކަކީ އެޗްޑީސީގައިވެސް ރެކޯޑުކުރެވިފައިވާ ލިޔުންތަކެއްކަން މިހާތަނަށް ކުރެވުނު ތަހުގީގުން ވަނީ ހާމަވެފައެވެ.
ތަހުގީގުގެ ތެރެއިން އިތުރު ކަންބޮޑުވުންތަކެއް ފާހަގަވެފައިވާކަމަށް ފުލުހުން ބުނެއެވެ. ޕޯޓަލް މެދުވެރިކޮށް އިމާރާތްކުރުމުގެ ހުއްދައަށް އެދި ހުށަހެޅި ލިޔުންތަކުގެ ތެރެއިން އެއް ލޮޓަށް އެއް ފަރާތަށްވުރެ ގިނަ ފަރާތުން ހުއްދައަށް އެދިފައިވާކަން ފާހަގަކުރެވިފައިވެއެވެ. މިކަން އެޗްޑީސީއަށް ފާހަގަވެގެން ހައުސިންގ މިނިސްޓްރީއާ މަޝްވަރާކޮށް، މައްސަލަ ބެލުމުގެ މަސައްކަތް ފެށިފައިވެއެވެ.
މިހާތަނަށް 6 ފަރާތަކާ ސުވާލުކުރެވިފައިވާއިރު، އޭގެތެރޭގައި އެޗްޑީސީގެ އެއްވެސް މުވައްޒަފެއް ނުހިމެނެއެވެ. އަދި ތަހުގީގު އިތުރަށް ފުޅާކުރުމަށްޓަކައި، ކުރީގެ އަދި މިހާރުގެ ސަރުކާރުގެ ދައުރުގައި ހައުސިންގ މިނިސްޓްރީ އަދި އެޗްޑީސީގައި މަސައްކަތްކުރި ފަރާތްތަކުގެ މިކަމާ ގުޅުންހުރިތޯ ބަލާނެކަމަށް ފުލުހުން ބުނެއެވެ.
މި މައްސަލައިގައި ފްލެޓަށް ކުރިމަތިލި ފަރާތަކަށްވެސް ބިން ދޫކުރެވިފައިވާކަން ފާހަގަކުރެވިފައިވާއިރު، މަގާމުގެ ނުފޫޒު ބޭނުންކޮށްގެން އެއްވެސް ކަމެއް ހިންގާފައިވޭތޯ ބަލާނެކަމަށް ފުލުހުން ހާމަކޮށްފައިވެއެވެ. މި މައްސަލައާ ގުޅިގެން ޕްރޮސެކިއުޓަރ ޖެނެރަލްގެ އޮފީހުން ވަނީ ފުލުހުންނާއި އޭސީސީއަށް ޖިނާއީ ތަހުގީގެއް ހިންގުމަށް އަމުރުކޮށްފައެވެ.
މި މައްސަލައާ ގުޅިގެން އެޗްޑީސީގެ އިސް މަގާމުތަކުގައި ތިބި ގިނަ ފަރާތްތަކެއް ވަނީ ސަސްޕެންޑް ކުރެވިފައެވެ. މީގެ ތެރޭގައި އެމްޑީ ފަޒުލް ރަޝީދު، އައިޓީ ކޮންސަލްޓެންޓް އަބްދުﷲ ޝުހޫދު، ސީއެފްއޯ އަބްދުﷲ ފާއިދު، ސީބީއޯ އަދި މީޑިއާ ޑިޕާޓްމަންޓްގެ ހެޑް އަހުމަދު ޔާމީން، އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން ހިމެނެއެވެ. އަދި އެންމެ ފަހުން އައްޔަންކުރެވުނު ޗެއާމަން އަހްމަދު ނާސިފް (ޑީޑީ) ފިޔަވައި ބޯޑުގެ އެހެން ހުރިހާ މެންބަރުންވެސް ވަނީ ސަސްޕެންޑް ކުރެވިފައެވެ.
