މާލެ ސިޓީ ކައުންސިލްގެ އާ އޮފީސް އިމާރާތެއް އެޅުމުގެ މަސައްކަތް ކުރިއަށް ގެންދާ ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެއެވެ. މީގެ ބޭނުމަކީ މިހާރު އެކި ތަންތަނުގައި ހިންގަމުންދާ ކައުންސިލްގެ ޚިދުމަތްތައް އެއް ފުރާޅެއްގެ ދަށުން ދިނުމެވެ.
މިދިޔަ ބުރާސްފަތި ދުވަހު ގްރީން ބިލްޑިންގައި ހިނގި އަލިފާނުގެ ހާދިސާއިން އެންމެ ބޮޑު ގެއްލުމެއް ލިބުނު އެއް ފަރާތަކީ އެ އިމާރާތުގައި ހިންގަމުންދިޔަ މާލެ ސިޓީ ކައުންސިލްގެ އޮފީހެވެ. މި ހާދިސާގައި މާލޭ ރައްޔިތުންގެ ރަށްވެހިކަމާއި، އަލަށް މާލެ ސަރަހައްދަށް އުފަންވާ ކުދިންގެ ލިޔެކިޔުންތަކާއި، އިމާރާތްތަކުގެ ރެޖިސްޓްރޭޝަން ފަދަ މުހިންމު ލިޔެކިޔުންތަކަށް ވަނީ ގެއްލުންވެފައެވެ.
މޭޔަރު އާޒިމް ވިދާޅުވިގޮތުގައި، މާލެ ސިޓީ ކައުންސިލްގެ މަސައްކަތްތައް މިހާރު ހިނގަމުންދަނީ އަށް ވަރަކަށް ތަނުގައެވެ. އެހެންކަމުން، މޭޔަރުކަމާ ހަވާލުވުމާއެކު އެންމެ ފުރަތަމަ ވެސް އިސްކަންދެއްވީ ވަކި އިމާރާތެއް އަޅައި، އެ އިމާރާތަށް ކައުންސިލްގެ މަސައްކަތްތައް ބަދަލުކުރުމަށެވެ. އާ އިމާރާތުގެ ކުރެހުންތަކާއި އިންޖިނިއަރިންގ ޑްރޯވިންގްސް ނިންމައި، އިމާރާތް އަޅާނެ ފަރާތެއް ހޯދުމުގެ މަސައްކަތް ވެސް ނިމި، މިހާރު އޮތީ މަސައްކަތް އެވޯޑުކުރުން އެކަނި ކަމަށް އާޒިމް ވިދާޅުވިއެވެ.
އަމިއްލަ އޮފީހެއް ނެތުމުން، އަލިފާނުގެ ހާދިސާއެއް ފަދަ ކަމެއް ދިމާވުމުން މުވައްޒަފުންނަށާއި މަސައްކަތްތަކަށް ދަތިތައް ކުރިމަތިވާ ކަމަށް ފާހަގަކުރައްވައި، ސަލާމަތާއި ރައްކާތެރިކަން ލިބޭ އަމިއްލަ އޮފީހަކަށް ބަދަލުވުމަށް މަސައްކަތްކުރާ ކަމަށް މޭޔަރު ވިދާޅުވިއެވެ. މިހާރު ބޭރު މުވައްޒަފުން ތިބި ތަނަކީ މީހުން ބައިތިއްބަން އެކަށީގެންވާ ތަނެއް ނޫން ކަމަށާއި، އިންފްރާސްޓްރަކްޗަރ ނެތް ތަނެއްގައި މަސައްކަތް ކުރަމުންދާ ކަމަށް ވެސް އާޒިމް ވިދާޅުވިއެވެ.
އަލިފާނުގެ ހާދިސާގައި ސަލާމަތްކުރެވުނު ސިޓީ ކައުންސިލްގެ ލިޔެކިޔުންތަކާއި އިމާރާތްތަކުގެ ކުރެހުންތައް މިހާރު ތަރުތީބުކުރަމުންދަނީ ގަލޮޅު މަދަރުސާގެ ހޯލެއްގައެވެ. މި ލިޔެކިޔުންތައް ތަރުތީބުކުރެވުމުން ލިބުނު ގެއްލުން ދެނެގަނެ، ގެއްލުނު ލިޔެކިޔުންތައް އަލުން ހޯދުމުގެ މަސައްކަތް ކުރިއަށް ގެންދާނެ ކަމަށް ސިޓީ ކައުންސިލުން ބުނެއެވެ. އަދި ކުރިމަގުގައި އަލިފާނުގެ ހާދިސާއެއް ދިމާވިޔަސް ލިޔެކިޔުންތަކަށް ގެއްލުން ނުވާނެ ގޮތަށް ކަންކަން ރާވައި ހިންގުމަކީ ކައުންސިލްގެ އެންމެ ބޮޑު އެއް އަމާޒު ކަމުގައި މޭޔަރު އާޒިމް ވަނީ ފާހަގަކުރައްވާފައެވެ.
