ފަތުރުވެރިކަމާއި ބެހޭ ވުޒާރާއިން އާންމުކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި މިއަހަރު މިހާތަނަށް ރާއްޖެއަށް 1.9 މިލިޔަނަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިމަހުގެ 14 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ 1،920،119 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1،763،710 ފަތުރުވެރިންނާ އަޅާބަލާއިރު 8.9 އިންސައްތައިގެ ކުރިއެރުމެކެވެ.
މިހާރު ރާއްޖެއަށް އެވްރެޖްކޮށް ދުވާލަކު 5،892 ފަތުރުވެރިން ޒިޔާރަތްކުރަމުންދެއެވެ. އަދި މިމަހުގެ ފުރަތަމަ 14 ދުވަހުގެ ތެރޭގައި 82،484 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 3.3 އިންސައްތައިގެ ކުރިއެރުމެކެވެ.
ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކުގެ ތެރޭގައި ޗައިނާއިން 257،794 ފަތުރުވެރިންނާއެކު ލިސްޓުގެ އެންމެ ކުރީގައި އުޅެނީ އެގައުމެވެ. ދެވަނައަށް ރަޝިޔާއިން 212،685 ފަތުރުވެރިންނާއި، ތިންވަނައަށް އިނގިރޭސިވިލާތުން 168،460 ފަތުރުވެރިން ޒިޔާރަތްކޮށްފައިވެއެވެ.
ކޮންމެ އަހަރެއްގެވެސް ޑިސެމްބަރު މަހުން ފެށިގެން ރާއްޖޭގެ ފަތުރުވެރިކަން ޕީކް ސީޒަނަށް އަރައި، ފަތުރުވެރިންގެ އަދަދު އިތުރުވެއެވެ. މިގޮތުން މިދިޔަ އަހަރުވެސް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޑިސެމްބަރު މަހުގައި ކަމަށްވާއިރު، އޭރު 194،690 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.
އަހަރު ނިމުމަށް 15 ވަރަކަށް ދުވަސް ބާކީ އޮތްއިރު، ސަރުކާރުގެ އަމާޒަކީ މިއަހަރު ރާއްޖެއަށް 2 މިލިޔަން ފަތުރުވެރިން ގެނައުމެވެ. މިހާރު 1.9 މިލިޔަން ފަތުރުވެރިން ޒިޔާރަތްކޮށްފައިވާއިރު، އަހަރުގެ އަމާޒު ހާސިލުކުރުމަށް އިތުރު 79،881 ފަތުރުވެރިން ބޭނުންވެއެވެ.
