ރަށްރަށުގެ ތަރައްޤީގެ މަސައްކަތްތައް ކުރިއަށް ގެންދަވާނީ ރައްޔިތުންގެ އަޑުއައްސަވައި، ރައްޔިތުންގެ އެދުމާ އެއްގޮތަށް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މުއިއްޒު މިހެން ވިދާޅުވީ އަރިއަތޮޅު ދެކުނުބުރީގެ ރަށްރަށަށް ކުރެއްވި ދަތުރުފުޅުގެ ތެރެއިން އޮމަދޫއަށް ޒިޔާރަތްކުރައްވައި، އެރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
އޮމަދޫގެ ރައްޔިތުންނަށް ދިމާވެފައިވާ ލަފާފުރުމުގެ ދަތިކަމާއި ރަށްގިރުމުގެ މައްސަލައަށް ހައްލެއް ގެނައުމަށް ދެ މަޝްރޫޢުއެއް އެކުއެކީގައި ކުރިއަށް ގެންދަވާނެ ކަމުގެ ޔަޤީންކަން ރައީސް ވަނީ ދެއްވާފައެވެ. މީގެ ތެރޭގައި ބަނދަރު ހެދުމާއި ގިރާ ސަރަހައްދު ހިމާޔަތްކުރުމުގެ މަސައްކަތް ހިމެނެއެވެ. ގިރާ ސަރަހައްދުގެ މަޝްރޫޢުގައި ކުރިން ސޮއިކުރެވިފައިވީ ނަމަވެސް، އެ މަސައްކަތް މިހާތަނަށް ނުފެށި އޮތްކަން ފާހަގަކުރައްވައި، އަންނަ އަހަރު މި ދެ މަޝްރޫޢުވެސް ފަށައިގެން ކުރިއަށް ގެންދަވާނެކަމަށް ވިދާޅުވިއެވެ.
ރައީސް ވިދާޅުވީ ފުރިހަމަ ބަނދަރެއް ހަދައިދެއްވާނެ ކަމަށާއި، އަދި ރަށްގިރުމުގެ މައްސަލައަށްވެސް ހައްލު ހޯދައިދެއްވާނެ ކަމަށެވެ. މި މަސައްކަތްތައް އަހަރުގެ ވީހާވެސް ކުރީކޮޅު ފެށުމަށް އިސްކަންދެއްވާނެ ކަމުގެ ޔަޤީންކަންވެސް ދެއްވިއެވެ. އަދި އަންނަ އަހަރުގެ ބަޖެޓުގައި އައު މަޝްރޫޢުތަކުގެ ތެރޭގައި ސިއްޙީ އަދި ތަޢުލީމީ ދާއިރާގެ ތަރައްޤީއަށް ޚާއްޞަ އިސްކަމެއް ދެއްވާނެ ކަމަށް ވިދާޅުވިއެވެ.
އޮމަދޫގެ ސިއްޙީ މަރުކަޒާއި ސްކޫލުގެ ޙާލަތު ރަނގަޅުކުރުމަށް އިތުރު ވަސީލަތްތައް ޤާއިމުކޮށްދެއްވާނެ ކަމަށާއި، މަލްޓިޕާޕަސް ހޯލަކާއި އިތުރު ކްލާސްރޫމްތަކެއް އެޅުމުގެ މަސައްކަތްވެސް އަންނަ އަހަރު ފައްޓަވާނެ ކަމުގެ ޔަޤީންކަން ރައީސް ދެއްވިއެވެ. އަދި މި ހުރިހާ މަސައްކަތެއްގެ ނަތީޖާ އަންނަ އަހަރު ފެންނާނެ ކަމުގައި ވިދާޅުވެ ވާހަކަފުޅު ނިންމަވާލެއްވިއެވެ.
ކޮމެންޓު ފޮނުވާ