ޓޫރިޒަމް މިނިސްޓްރީން މިއަދު ހާމަކުރި ތަފާސް ހިސާބުތަކުން ދައްކާގޮތުގައި މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1,920,119 އަށް އަރައިފިއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 8.9 ޕަސެންޓުގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1.8 މިލިއަން ފަތުރުވެރިންނެވެ.
ސަރުކާރުން މި އަހަރަށް އަމާޒުކޮށްފައިވާ 2 މިލިއަން ފަތުރުވެރިންގެ ލަނޑުދަނޑި ހާސިލުކުރުމަށް މިހާރު ބޭނުންވަނީ އިތުރު 80,000 ފަތުރުވެރިންނެވެ. މިހާރު ދުވާލަކު ރާއްޖެއަށް 5,000 އާއި 7,000 އާ ދެމެދުގެ އަދަދަކަށް ފަތުރުވެރިން ޒިޔާރަތްކުރަމުންދާއިރު، ކްރިސްމަސް އަދި އައު އަހަރާ ދިމާކޮށް މި އަދަދު އިތުރަށް މައްޗަށް ދާނެކަމަށް ބެލެވެއެވެ. މި ކުރިއެރުމާއެކު ކުރިއަށް އޮތް ހަފްތާގެ ކުރީކޮޅު 2 މިލިއަން ފަތުރުވެރިންގެ ލަނޑުދަނޑި ހާސިލުވާނެކަމަށް ލަފާކުރެވެއެވެ.
މި އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވަނީ ޗައިނާއިންނެވެ. އެގޮތުން 257,794 ފަތުރުވެރިން ޗައިނާއިން ޒިޔާރަތްކޮށްފައިވާއިރު، ދެވަނައަށް އެންމެ ގިނައިން ފަތުރުވެރިން އައިސްފައިވަނީ 212,685 ފަތުރުވެރިންނާއެކު ރަޝިއާއިންނެވެ. އިނގިރޭސިވިލާތުން 168,460 ފަތުރުވެރިންނާއެކު ތިންވަނައަށް އެންމެ ގިނައިން ފަތުރުވެރިން ޒިޔާރަތްކޮށްފައިވެއެވެ. ހަތަރުވަނައިގައިވަނީ 148,402 ފަތުރުވެރިންނާއެކު ޖަރުމަނުވިލާތެވެ. އަދި ފަސްވަނައިގައިވަނީ 129,490 ފަތުރުވެރިންނާއެކު އިޓަލީއެވެ. މިދިޔަ އަހަރު އެންމެ ގިނަ ފަތުރުވެރިން ޒިޔާރަތްކުރި އިންޑިއާ މިއަހަރު ވަނީ ހަވަނަ ހިސާބަށް ފައިބައި، 121,000 އަށްވުރެ ގިނަ ފަތުރުވެރިން ޒިޔާރަތްކޮށްފައެވެ.
