ރާއްޖޭގައި ރުއްތަކަށް ގެއްލުންދޭ ރުކުމަޑި ކޮންޓްރޯލް ކުރުމަށްޓަކައި ޗައިނާގެ އެހީގައި ޚާއްޞަ ލެބޯޓްރީއެއް ގާއިމުކުރުމުގެ މަސައްކަތް ފެށިގެންދާއިރު، މިކަމަށް ބޭނުންވާ ދިރާސާތައް ކުރުމަށް ޗައިނާގެ މާހިރުން ރާއްޖެއަށް ޒިޔާރަތްކޮށްފިއެވެ.
މިއީ މިއަހަރުގެ ކުރީކޮޅު ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ދެ ގައުމުގެ މެދުގައި ވެވުނު އެއްބަސްވުމެއްގެ ދަށުން ކުރިއަށްގެންދާ މަސައްކަތެކެވެ. މި އެއްބަސްވުމުގެ މަޤްޞަދަކީ ރުއްތަކަށް ގެއްލުންދޭ މަޑިތައް ކޮންޓްރޯލްކުރުމަށް ތިމާވެއްޓާ ރައްޓެހި، ދެމެހެއްޓެނިވި ހައްލެއް ހޯދުމެވެ.
މި މަޝްރޫޢުގެ ދަށުން ކޮކޮނަޓް ހިސްޕިޑް ބީޓްލްއަށް ހަމަލާދޭ ޕެރެސިޓޮއިޑް އާލާކޮށް ގިނަކުރުމަށް ޚާއްޞަ ލެބޯޓްރީއެއް ގާއިމުކުރުމާއި، މުވައްޒަފުންގެ ހުނަރު އިތުރުކުރުމަށް ޚާއްޞަ ޕްރޮގްރާމެއް ހިންގުމަށް ވަނީ ނިންމާފައެވެ. މި މަސައްކަތް ޗައިނާގެ މައި ސަރުކާރުން ވަނީ ޗައިނީޒް އެކަޑަމީ އޮފް ޓްރޮޕިކަލް އެގްރިކަލްޗަރަލް ސައިންސަސް (ކަޓާސް) އާ ހަވާލުކޮށްފައެވެ.
މި މަސައްކަތަށްޓަކައި ކަޓާސްގެ ހަތަރު ޕްރޮފެސަރުން މި މަހުގެ 11 ވަނަ ދުވަހު ރާއްޖެއަށް ޒިޔާރަތްކޮށް، މިހާރު ވަނީ ހދ. ހަނިމާދޫގައި މަސައްކަތް ފަށާފައެވެ. އެ ޓީމުގެ މަޤްޞަދަކީ ނެޗުރަލް އެނެމީ ލެބޯޓަރީއެއް ގާއިމުކުރުމަށް ބޭނުންވާ ދިރާސާތައް ހެދުމާއި، ލެބޯޓްރީ ގާއިމުކުރާނެ ސަރަހައްދު ކަނޑައެޅުމެވެ.
ދަނޑުވެރިކަމާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، ހަނިމާދޫގައި ހިސްޕިޑް ބީޓްލްގެ މައްސަލަ ދިމާވެފައިވުމާއި، އެ ރަށުގެ އެގްރިކަލްޗަރ ސެންޓަރުގައި ލެބޯޓްރީއަށް ބޭނުންކުރެވިދާނެ އިމާރާތްތަކެއް ހުރުމާއެކު، އެއީ މި ވަގުތަށް އެންމެ އެކަށޭނަ ތަން ކަމުގައި ޗައިނާގެ ޓީމުން ފާހަގަކޮށްފައިވެއެވެ. މި ދަތުރުގައި ބަޔޮލޮޖިކަލް ކޮންޓްރޯލް މެނޭޖްމަންޓް ޕްރޮޓޮކޯލްތަކާއި އިންސެކްޓް-ޕެސްޓް އިންޓަރެކްޝަންތަކާ ބެހޭ މުހިންމު މަޢުލޫމާތުތައް މިނިސްޓްރީގެ ފަންނީ މުވައްޒަފުންނާ ހިއްސާކުރެވިފައިވެއެވެ.
