މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދެ ދުވަހުގެ މުއްދަތަށް ބާއްވާ ރިސަރޗް ކޮންފަރެންސްގެ ތެރެއިން، ދިރާސީ މަސައްކަތްތަކަށް ޚާއްސަކުރެވިފައިވާ 1 މިލިޔަން ރުފިޔާގެ ފަންޑެއް އިފްތިތާޙްކޮށްފިއެވެ. ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރު ޑރ. މަހްމޫދު ޝައުގީ އިފްތިތާޙްކުރެއްވި މި ފަންޑުގެ މައިގަނޑު މަޤްޞަދަކީ ދިރާސާކުރާ ފަރާތްތަކަށް ފަހި މާޙައުލެއް ޤާއިމްކޮށް، ދިރާސާތައް ކުރުމަށް ހިތްވަރުދިނުމެވެ.
މީގެއިތުރުން، މި ކޮންފަރެންސްގެ ތެރެއިން ދިރާސީ މަސައްކަތްތަކާ ގުޅޭ ދެ މުހިންމު އެއްބަސްވުމެއްގައި ސޮއިކުރެވުނެވެ. މިގޮތުން ދިރާގާއެކު ވެވުނު އެއްބަސްވުމަކީ ދެމެހެއްޓެނިވި ކުރިމަގަކަށް ދިރާސާތައް ފުޅާކޮށް، އީޖާދީ އުފެއްދުންތައް ކުރިއެރުވުމަށް އެކުލަވާލެވުނު އެއްބަސްވުމެކެވެ. އަދި މެލޭޝިއާގެ އިސްލާމް ސެލަންގޯރު ޔުނިވަރސިޓީއާއެކު ވެވުނު އެއްބަސްވުމަކީ އިޤްތިޞާދީ ދިރާސާތަކާއި، ތަޢުލީމީ އަދި އީޖާދުކުރުމުގެ ދާއިރާއިން އެކުގައި މަސައްކަތްކުރުމަށް ސޮއިކުރެވުނު އެއްބަސްވުމެކެވެ.
މަރުކަޒީ ބޭންކުން އިންތިޒާމުކުރި ފުރަތަމަ ރިސަރޗް ކޮންފަރެންސްގެ ގޮތުގައި ބޭއްވުނު މި ކޮންފަރެންސްގައި ރާއްޖެއާއި ރާއްޖެއިން ބޭރުގެ ދިރާސާވެރިންނާއި، މާލީ އިދާރާތަކުގެ ބޭފުޅުންނާއި، އިޤްތިޞާދީ އަދި ފައިނޭންޝަލް ޓެކްނޮލޮޖީ ދާއިރާގެ ގިނަ ފަރާތްތަކެއް ބައިވެރިވިއެވެ. ކޮންފަރެންސްގެ ފުރަތަމަ ސެޝަންގައި އެމްއެމްއޭގެ ގަވަރުނަރު އަޙްމަދު މުނައްވަރު، އެމްއެންޔޫގެ ޗާންސެލަރު ޑރ. ޝައުގީ އަދި ރިޒާވް ބޭންކް އޮފް އިންޑިއާގެ ޑެޕިއުޓީ ގަވަރުނަރު ވާހަކަފުޅު ދެއްކެވިއެވެ.
"އިޤްތިޞާދީ ދިރާސާތައް ފުޅާކުރުމުގައި ދެމެހެއްޓެނިވި ކުރިމަގަކަށް ސިޔާސަތުތައް ބައްޓަންކޮށް އީޖާދުކުރުން" މި ތީމްގެ ދަށުން ބޭއްވޭ މި ކޮންފަރެންސްގައި ކީނޯޓް ސެޝަންތަކާއި، ޕެނަލް ޑިސްކަޝަންތަކާއި، ދިރާސީ ކަރުދާސްތައް ހުށަހެޅުމުގެ އިތުރުން ވޯކްޝޮޕްތައްވެސް ހިމެނެއެވެ.
