މާލޭގައި ބުރާސްފަތި ދުވަހު ހިނގި އަލިފާނުގެ ހާދިސާގައި އެންމެ ބޮޑު އިސްކަމެއް ދިނީ އެއްވެސް މީހެއްގެ ފުރާނައަށް ގެއްލުމެއް ލިބުނަ ނުދިނުމަށް ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވެއްޖެއެވެ.
އަލިފާނުގެ ހާދިސާއާ ގުޅިގެން ބޭއްވުނު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން، ހާދިސާގެ މައުލޫމާތު ލިބުނީ ބުރާސްފަތި ދުވަހުގެ ހެނދުނު 6:27 ގައި ކަމަށާއި، 6:30 ހާއިރު ހާދިސާ ހިނގި ސަރަހައްދަށް ގޮސް އަލިފާން ނިއްވުމުގެ މަސައްކަތް ފުރަތަމަ ޓީމުން ފެށިކަމަށް ހިލްމީ ވިދާޅުވިއެވެ. ދެ ޓީމަކަށް ބަހާލައިގެން އިމާރާތުގެ އެތެރެއަށް ވަދެ، އަލިފާން ރޯވެފައިވާ ތަންތަން ދެނެގަތުމުގެ މަސައްކަތް ފެށުނެވެ.
އޭރު ވަރަށް ބޮޑަށް ދުން އަރަމުންދިޔަ ކަމަށާއި، އަލިފާނުގެ ނިޝާނެއް ފެންނަން ނެތުމުން ތާމަލް ކެމެރާއެއްގެ އެހީގައި އަލިފާން ހިފާފައިވާ ތަންތަން ދެނެގަނެވުނެވެ. އަލިފާން ނިއްވަން ފެށި ވަގުތު އަލިފާން ފަޅައިގެން ގޮސް ފެތުރެން ފެށުމާ ގުޅިގެން، އެތެރޭގައި ތިބުމަކީ ރައްކާތެރިކަމަކަށް ނުވާތީ، ޓީމުތައް ބޭރަށް ނިކުމެ އަލުން އަލިފާން ނިއްވުމުގެ މަސައްކަތް ފެށުނު ކަމަށް ހިލްމީ ވިދާޅުވިއެވެ.
މި ހާދިސާގައި އެންމެ ބޮޑު އިސްކަމެއް ދެވުނީ އެއްވެސް މީހެއްގެ ފުރާނައަށާއި ރައްޔިތުންގެ މުދަލަށް ގެއްލުމެއް ނުލިބި އަލިފާން ކޮންޓްރޯލް ކުރުމަށް ކަމަށް ހިލްމީ ފާހަގަކުރެއްވިއެވެ. މާލޭގައި ބުރާސްފަތި ދުވަހު ހެނދުނު ސަރުކާރުގެ ރަސްމީ ގަޑި ފެށުމުގެ ކުރިން އަލިފާން ފުރަތަމަ ރޯވީ ހައުސިންގ މިނިސްޓްރީގައެވެ. އޭގެފަހުން އަލިފާން ފެތުރިގެން ގޮސް ހައުސިންގ މިނިސްޓްރީއާ ޖެހިގެން ހުރި ކޮންސްޓްރަކްޝަން މިނިސްޓްރީއަށާއި، އިރުކޮޅެއް ފަހުން އެންވަޔަރަންމަންޓް މިނިސްޓްރީއަށް އަލިފާން ރޯވިއެވެ.
