މޫސުމާ ބެހޭ ގައުމީ އިދާރާ (މެޓް) އިން މިއަދު އިއުލާނުކުރި ގޮތުގައި ދިވެހިރާއްޖޭގެ ދެކުނުގައި ވައި ގަދަވެ، އުތުރަށް ބޯކޮށް ވާރޭވެހޭނެ ކަމަށް ލަފާކުރެވެއެވެ.
މޫސުމީ ހާލަތަށް ރިއާޔަތްކޮށް، ހއ އިން ފެށިގެން ބ އަތޮޅާ ހަމައަށް ގުގުރުމާއެކު ބޯކޮށް ވާރޭވެހޭނެކަމަށް ބެލެވޭތީ ވައިޓް އެލާޓެއް ނެރެފައިވެއެވެ. ހަމަމިއާއެކު، ކަނޑުތައް ގަދަވާނެކަމަށް ލަފާކުރެވޭތީ އައްޑޫ ސިޓީއާއި ފުވައްމުލަކު ސިޓީއަށްވެސް އެލާޓެއް ނެރެފައިވެއެވެ. މެޓް އޮފީހުގެ މަޢުލޫމާތުގައިވާ ގޮތުން، މި ދެ ސިޓީގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ކަނޑުތައް ގަދަވާނެއެވެ.
ފާއިތުވި 24 ގަޑިއިރުގެ ތެރޭގައި އެންމެ ބޯކޮށް ވާރޭވެހުނީ ހއ. ކެލައަށް ކަމަށްވާއިރު، އެރަށަށް 51 މިލިމީޓަރުގެ ވާރޭ ވެހިފައިވެއެވެ. ދެވަނައަށް އެންމެ ގިނައިން ވާރޭވެހުނީ ބ. ދަރަވަންދޫއަށް ކަމަށްވާއިރު، އެރަށަށް 41.5 މިލިމީޓަރުގެ ވާރޭ ވެހިފައިވާކަން މެޓް އޮފީހުގެ ހިސާބުތަކުން ދައްކައެވެ.
މިއަދުގެ މޫސުން ލަފާކުރާގޮތުން، އުތުރުގެ އެކި ހިސާބުތަކަށް ވިއްސާރަކޮށް، ބައެއް ރަށްރަށަށް ގުގުރުމުގެ އިތުރުން، ދެކުނާއި މެދުރާއްޖެތެރޭގެ އެކި ހިސާބުތަކަށް ކެރީގެ އަސަރު ކުރާނެ ކަމަށް މެޓް އޮފީހުން މަޢުލޫމާތު ދީފައިވެއެވެ.
