ފުވައްމުލަކު، ދިގުވާނޑު، މާޒީ، އަހްމަދު ތަސްލީމް ނަމަކަށް ކިޔާ މީހަކު މާލޭގެ ޗާންދަނީމަގުގައި ހުންނަ ފިހާރަޔަކުން ސެންޓު ފުޅިއެއް ވަގަށް ނެގުމުގެ މައްސަލައިގައި ހަ މަސް ދުވަހުގެ ޖަލު ހުކުމެއް އިއްވައިފިއެވެ.
ތަސްލީމްގެ މައްޗަށް ކުރެވުނު ދައުވާއަކީ "އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށް" އެވެ. މިއަހަރުގެ މޭ މަހު ހިނގި މި މައްސަލައިގައި ތަސްލީމް ވަގަށް ނެގީ ޝެނަލް ބްރޭންޑްގެ 4،000 ރުފިޔާގެއަގުހުރި ސެންޓު ފުޅިއެކެވެ. މައްސަލައިގެ ޝަރީއަތުގައި ތަސްލީމް މި ކުށަށް އިންކާރުކުރި ނަމަވެސް، ސީސީޓީވީ ފުޓޭޖް ހިމެނޭ ދައުލަތުގެ ހެކިތަކުގެ އަލީގައި ކުށް ސާބިތުވެފައިވެއެވެ.
ކްރިމިނަލް ކޯޓުން މިދިޔަ ހަފްތާގައި ނިންމި މި މައްސަލައިގައި ތަސްލީމްގެ މައްޗަށް ކުރިން ސާބިތުވެފައިވާ ދެ ޖިނާއީ ކުށެއް ހުރިކަން އެނގެއެވެ. އޭނާއަށް އިއްވި ހަ މަސް ދުވަހުގެ ޖަލު ހުކުމުން މައްސަލައާ ގުޅިގެން ބަންދުގައި ހޭދަކުރި މުއްދަތު އުނިކުރުމުން، މިހާރު ތަންފީޒުކުރަން ޖެހެނީ ފަސް މަހާއި 14 ދުވަހުގެ މުއްދަތެވެ.
